Shırshıq qalasındaǵı Respublikalıq qánigelestirilgen Ana hám bala salamatlıǵı ilimiy-ámeliy medicina orayınıń Tashkent wálayatı filialında biybaha xirurgiyalıq ámeliyat ótkerildi.

Atap aytqanda, hámiledarlıqtıń 33-34 háptesinde “operaciya” arqalı dúnyaǵa kelgen siam egizekleri tuwılǵannan soń 9 saat ótip, jergilikli sharayatta oǵada quramalı hám joqarı texnologiyalıq operaciya arqalı ajıratıp alındı. Bes saat dawam etken xirurgiyalıq ámeliyat Respublikalıq perinatal orayı janındaǵı Neonatal xirurgiya orayınıń basshısı, medicina ilimleriniń doktorı, professor Baxtiyor Ergashev basshılıǵındaǵı Tashkent wálayatınıń tájiriybeli shıpakerler toparı tárepinen orınlandı.
– Bunday quramalı operaciyalar hár qashan da ámelge asırılmaǵan bolıp, bunday jaǵdaylarda kóbinese uzaq múddetli tallaw hám tayarlıq talap etiledi.
Muddetinen aldın tuwılǵan siam egizeklerin qıstawlı túrde hám wálayat dárejesinde tabıslı ajıratıp alıw mámleketimiz medicinasınıń jańa basqıshqa kóterilgeninen dárek beredi, – deydi Tashkent wálayatı densawlıqtı saqlaw basqarması baslıǵınıń orınbasarı Feruza Rahmatullaeva.
Operaciyada qatnasqan bir topar qánigeler “Ózbekstan Respublikası densawlıqtı saqlaw xızmetkeri” kókirek belgisi menen sıylıqlandı. Densawlıǵı turaqlasqan náresteler hám olardıń anasına emlewxanadan úyine ruqsat berildi. Olardıń jaǵdayı endi Ahangaran shıpakerleri qadaǵalawında boladı.

A.Musaev, ÓzA