Elimizde hayal-qızlardıń jámiyettegi ornın hám abırayın, olardıń jámiyetlik turmıstaǵı belsendiligin arttırıw baǵdarında keń kólemli reformalar ámelge asırılmaqta. Kúsh strukturaları qatarında xızmet etip atırǵan áskeriy hayal-qızlar arasında ótkerilip atırǵan “Tumaris izbasarları” respublikalıq tańlawı da usı maqsetke qaratılǵan.

“Watan mehri júregimde” súreni astında ótkerilip kiyatırǵan bul tańlaw áskeriy xızmetker hayal-qızlardıń óz kásibiniń haqıyqıy sheberi sıpatında Watan aldındaǵı muqaddes minnetin sadıqlıq hám pidayılıq penen orınlawı, sonıń menen birge, shańaraqta gózzal biyke hám miyrimli ana sıpatındaǵı ullı juwapkershilikli wazıypaların da tolıq orınlap kiyatırǵanın keń jámiyetshilikke úlgi sıpatında kórsetedi. Sonday-aq, búgingi globallasıw dáwirinde eldimiz hayal-qızlarınıń bilim alıw hám kásip tańlaw imkaniyatların jáne de keńeytiwge, jámiyetlik-siyasiy processlerdegi belsendiligin arttırıwǵa, ruwxıy-aǵartıwshılıq kózqarasın bayıtıwǵa jáne jas áwladtı watansúyiwshilik hám milliy qádiriyatlarǵa húrmet ruwxında tárbiyalawǵa xızmet etedi. Bul bolsa, óz gezeginde, hayal-qızlar arasında erte turmısqa shıǵıw, erte tuwıw, huqıqbuzarlıq hám jınayatshılıq sıyaqlı túrli unamsız jaǵdaylardıń aldın alıwda áhmiyetli orın iyeleydi.
Usı jılı tańlawdı jańasha mazmunda shólkemlestiriw maqsetinde Shańaraq hám hayal-qızlar komiteti, Qorǵanıw, Ishki isler, Ayrıqsha jaǵdaylar ministrlikleri, Mámleketlik qáwipsizlik xızmeti, Milliy gvardiya hám Bajıxana komiteti arasında qospa qararǵa qol qoyılıp, tańlaw rejesin tastıyıqladı. Usı tiykarda anıq ilajlar ámelge asırılmaqta.
Tańlaw Qorǵanıw ministrligi basshılıǵında ministrlik qaramaǵındaǵı mákemelerde hám Joqarı bilimlendiriw ministrligi janındaǵı Bilim hám mamanlıqlardı bahalaw agentliginde shólkemlestirilip, onıń dáslepki kúni kúsh strukturalarındaǵı áskeriy xızmetker hayal-qızlar tárepinen Jańa Ózbekstan baǵındaǵı “Ǵárezsizlik monumentine” gúl qoyıw máresimi ótkerildi.
Bunnan soń Ózbekstan Respublikası áskeriy qáwipsizlik hám qorǵanıw universitetinde áskeriy xızmetker hayal-qızlar hám áskeriy orkestr qatnasıwında saltanatlı áskeriy parad shólkemlestirildi.
Tańlawdıń tiykarǵı bóliminde hayal áskeriy xızmetkerlerden ibarat 6 komanda tanıstırıw, test sınaǵı, oq atıw, áskeriy hám fizikalıq tayarlıq, awqat tayarlaw hám erkin tema shártlerinde óz-ara bellesti.
Juwmaqlawshı basqısh hám sıylıqlaw máresimi búgin, 9-oktyabr kúni Kúsh strukturaları uyımlarınıń basshıları, ministrlikler hám uyımlardıń wákilleri, “Aqıllı hayallar” háreketiniń belsendileri, mámleketlik sıylıqlardıń iyeleri hám belsendi hayal-qızlardıń qatnasıwında ótkeriledi.

Kamola Yusupova, Nosirjon Haydarov, Asliddin Ali, ÓzA