Oliy Majlis Senatına Polsha Respublikası parlamenti Senatınıń Emigraciya isleri hám sırt eldegi polyaklar menen baylanıslar komissiyasınıń baslıǵı Bogdan Borusevich basshılıǵındaǵı delegaciya keldi.

Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń baslıǵı Alisher Azamxwjaev penen ushırasıwda Ózbekstan hám Polsha arasında parlamentleraralıq birge islesiwdi keńeytiw, eki mámleket xalıqlarınıń tariyxıy doslıq baylanısların bekkemlew, sonday-aq, mádeniy-gumanitarlıq tarawdaǵı qatnasıqlardı jedellestiriw máseleleri dodalandı.
Parlamentleraralıq birge islesiw tiykarında eki mámleket arasındaǵı sawda aylanısın arttırıw, Evropa Awqamı bazarlarına milliy ónimlerdiń eksportın keńeytiw, sawda úylerin shólkemlestiriw, sonday-aq, sawda, ekonomika, investiciya, turizm, bilimlendiriw hám aymaqlararalıq birge islesiw baǵdarlarında birgeliktegi joybarlardı ámelge asırıwǵa itibar qaratıldı.
Ekinshi jer júzilik urıs dáwirinde Ózbekstanǵa deportaciya etilgen Polsha puqaralarına ózbek xalqı tárepinen kórsetilgen miyrim-shápáát hám miymandoslıq ayrıqsha atap ótildi. Mámleketimiz aymaǵında jerlengen polyaklardıń esteligi húrmet penen eske alındı.
Bogdan Borusevich Ekinshi jer júzilik urıs dáwirinde polyak xalqına kórsetilgen insanıylıq járdemi sonday-aq, elimizdegi polyaklar qoyımshılıqlarına qaratılıp atırǵan itibar hám alıp barılıp atırǵan abadanlastırıw jumısları ushın ózbek xalqına tereń minnetdarshılıq bildirdi.

N.Abduraimova, ÓzA