Keshe AQSh Senatında federal húkimetti qarjılandırıwdı tiklew haqqındaǵı nızam joybarı altınshı márte qaytarıldı.

Kongresstiń 54 aǵzası respublikashılar tárepinen alǵa qoyılǵan joybardı qollap-quwatladı, 45 deputat bolsa qarsı dawıs berdi. Nızam shıǵarıwshılardıń eki jetekshi partiya tárepinen usınılǵan usınday nızam joybarları boyınsha bir pikirge keliw maqsetindegi aldınǵı urınısları da nátiyjesizlikke ushıraǵan. Nátiyjede “shatdaun” ataması menen belgili bolǵan jaǵday mámleketlik uyımlardıń jumısına sezilerli unamsız tásir kórsetpekte. Máselen, kúni keshe salıq xızmetiniń xızmetkerleri haqı tólenbeytuǵın dem alısqa shıǵarıldı.
Mámleket Ǵaznashılıq departamentiniń bayanatında aytılıwınsha, Ishki dáramat xızmeti xızmetkerleri jańa byudjetti islep shıǵıw juwmaqlanıp atırǵan waqıtta óziniń esabınan “dem aladı.”
– Bul haqı tólenbeytuǵın dem alıs waqtında siz wazıypańızdı orınlamaysız hám miynet haqı almaysız, – delingen Ǵaznashılıq departamentiniń “barlıq salıq uyımları xızmetkerlerine” jibergen xabarnamasında. – Tastıyıqlanǵan jıllıq, kesellik hám sudqa shıǵıw dem alısları aǵımdaǵı dáwir ushın biykar etiledi.
Salıq xızmetkerlerinen jumıs ornında bolmaw soraldı. “Sizge nızamlı túrde islew qadaǵan etiledi,” delingen xatta.
Hújjette aytılıwınsha, ayırım xızmetkerler agentlik basshısınıń kelisimi menen hám burınǵısınan basqasha tárizde wazıypasın atqarıwda dawam etedi.

S.Rahimov, ÓzA