Oliy Majlis janındaǵı Puqaralıq jámiyeti institutların qollap-quwatlaw jámiyetlik fondınıń qarjıların basqarıw boyınsha parlament komissiyası ótkergen tańlawda puqaralıq jámiyeti institutlarınan 618 arza qabıl etilgen. Komissiyanıń juwmaǵına bola, 66 joybar jeńimpaz dep tabılǵan.

Bul Parlament komissiyası májilisinde atap ótildi. Májiliste 12 baǵdar boyınsha, sonıń ishinde, korrupciyaǵa qarsı gúresiw tarawındaǵı áhmiyetli máselelerdi sheshiwge qaratılǵan gezektegi mámleketlik grant tańlawın járiyalaw boyınsha qarar qabıl etildi. Bul tańlaw sheńberinde 5,8 milliard sum qarjı esabınan puqaralıq jámiyeti institutlarınıń joybarların qollap-quwatlaw rejelestirilmekte.
***
Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń májilisinde bolsa Ózbekstannıń Egipet, Oman, Qatar hám Iran mámleketlerindegi diplomatiyalıq wákilxanaları basshılarınıń esabatları tıńlandı.
Elshiler eki tárepleme qatnasıqlardı bekkemlew, joqarı dárejedegi sapar etiwler sheńberinde qol qoyılǵan “jol kartaları”nıń orınlanıwı, investiciyalardı tartıw, milliy ónimlerdiń eksportın keńeytiw, sırt elli turistlerdiń aǵımın arttırıw jáne sırt elde mámleketimiz puqaralarınıń huqıqları menen máplerin qorǵaw baǵdarında ámelge asırılıp atırǵan jumıslar haqqında esabat berdi.
Mámleketimizdiń Egipet penen sawda, farmacevtika, bilimlendiriw hám awıl xojalıǵı tarawlarındaǵı birge islesiwi keńeymekte. Oman menen qatnasıqlarda qospa turistlik joybarlardı ámelge asırıw, mádeniy ilajlar ótkeriw hám transport jónelislerin jolǵa qoyıw máselelerine itibar qaratılıp atırǵanı atap ótildi.
Ózbekstan-Qatar qatnasıqlarında investiciya hám “jasıl” energetika, infrastruktura hám turizm tarawlarında iri birgeliktegi joybarlardı ámelge asırıw máselelerine tiykarǵı áhmiyet berilgen. Iran menen bolsa, sanaat, tekstil ónimin islep shıǵarıw hám awıl xojalıǵı sıyaqlı tarawlarda birgeliktegi joybarlar ámelge asırılıp atırǵanı atap ótildi.
Májiliste senatorlar tárepinen diplomatiyalıq wákilxanalar jumısınıń nátiyjeliligin arttırıw, sırtqı ekonomikalıq birge islesiwdi tereńlestiriw, turizm tarawında jańa baslamalardı qollap-quwatlaw hám sırt el investiciyaların tartıw boyınsha anıq usınıslar alǵa qoyıldı.

N.Abduraimova,ÓzA