Ózbekstan Respublikası Prezidenti Shavkat Mirziyoevtiń BMSh Bas Assambleyası 80-sessiyasındaǵı shıǵıp sóylegen sózi sırt elli ekspert hám ilimiy topar wákilleriniń itibarın tarttı.

Prezidentimizdiń shıǵıp sóylegen sózinde alǵa qoyılǵan baslamalar tek ǵana regionallıq emes, al global áhmiyetke iye ekeni menen de oǵada áhmiyetli bolıp esaplanadı. Malayziya xalıqaralıq islam universitetiniń professorı Shukran Abdul Rahmon hám Imam Moturidiy xalıqaralıq ilimiy-izertlew orayı direktorınıń orınbasarı Shahzod Islomov AQShtıń “Islamicity” portalında “Ózbekstannıń global kózqarası: insan qádirin ulıǵlaw, regionallıq birge islesiw hám xalıqaralıq tatıwlıq” (Uzbekistan’s Global Vision: Advancing Human Dignity, Regional Cooperation, and International Solidarity) atamasında maqala járiyaladı.
Avtorlardıń jazıwınsha, zamanagóy dúnyadaǵı dinamikalıq ózgerisler kóplegen mámleketlerdi insan turmısı hám jáhán rawajlanıwınıń perspektivalarına jańasha qatnaslardı qabıl etiwge májbúr etpekte. Basqa mámleketler sıyaqlı Ózbekstan da tez pátlerde ózgerip atırǵan hám barǵan sayın qıyınlasıp atırǵan dúnya ortalıǵındaǵı qıyınshılıqlardı jeńip ótiwge umtılmaqta.
BMSh Bas Assambleyasınıń 80-sessiyasında Ózbekstan Respublikası Prezidenti Shavkat Mirziyoev mámlekettiń bul qıyın sharayatta tutqan tiykarǵı ornın hám erisken jetiskenliklerin atap ótip, “Jańa Ózbekstan”dı qurıwdıń konceptuallıq baǵdarları haqqında sóz etti. Bayanatta milliy rawajlanıw maqsetlerine erisiw hám awızbirshilik, tınıshlıq hám insan qádirine tiykarlanǵan global kózqaras óz kórinisin tapqan.
Ózbekstannıń eń tiykarǵı maqseti hár bir shańaraq hám puqaranıń turmısın jaqsılaw, kámbaǵallıqtı qısqartıw hám insan qádirin ulıǵlaw bolıp esaplanadı. Mámlekettiń bir qatar áhmiyetli jetiskenlikleri bul baǵdardaǵı jedel alǵa ilgerilewin bildiredi. Sawda, investiciya hám transport tarawlarındaǵı kórsetkishler region boyınsha derlik bes esege ósken. Ózbekstan shegara aymaqlarında birgeliktegi investiciyalıq baǵdarlamalar, sawda hám sanaat zonaların shólkemlestirdi, iri infrastrukturalıq joybarlardı ámelge asırmaqta. Sonıń menen birge, mámleket xalıqaralıq qatnasıqlarda biyǵárez, juwapkershilikli qatnasıwshı sıpatında ortaǵa shıǵıp, awızbirshilik, turaqlılıq hám Oraylıq Aziyanıń tınıshlıq súyer siyasatın kórsetpekte.
Kámbaǵallıq dárejesi 35 procentten 6,6 procentke shekem keskin qısqardı. Bul bilimlendiriw hám ilim tarawlarındaǵı reformalar, joqarı texnologiyalı tarmaqlardı rawajlandırıw, “jasıl energetika”, transporttı modernizaciyalaw, kishi biznes hám jumıs orınların jaratıw arqalı ámelge asırıldı.
Maqala avtorlarınıń tán alıwınsha, bul jetiskenliklerdiń tiykarǵı faktorlarınan biri kúshli hám jańa shaqırıqlarǵa tayar bilimlendiriw sistemasınıń bar ekenligi bolıp esaplanadı. Nátiyjede mektepke shekemgi bilimlendiriwge qamtıp alıw 27 procentten 78 procentke arttı. Joqarı bilimlendiriwde jaslardıń qamtıp alınıwı 9 procentten 42 procentke jetti. Sonday-aq, oqıtıwshılıq kásibiniń abırayın hám statusın arttırıw mámlekettiń áhmiyetli tiykarǵı baǵdarına aylandı.
Sonıń menen birge, mámleket zamanagóy densawlıqtı saqlaw sistemasın jaratıw, hayal-qızlardıń jámiyetlik-siyasiy turmıs hám isbilermenliktegi rolin kúsheytiwge de ayrıqsha itibar qaratpaqta.
Ásirese, Ózbekstan Respublikası Prezidenti Shavkat Mirziyoevtiń Tashkentte Islam civilizaciyası orayın shólkemlestiriw arqalı islamnıń adamgershilik, keńpeyillik hám aǵartıwshılıq táliymatın úgit-násiyatlawdaǵı baslamaları, BMSh rezidenciyasında Imam Buxariy, Imam Termiziy hám Imam Moturidiy sıyaqlı ullı oyshıllardıń ilimiy miyrasın zamanagóy usılda kórsetiwge umtılısı maqtawǵa ılayıq, delinedi maqalada.
Mámleketimiz basshısınıń BMSh Bas Assambleyası 80-yubiley sessiyasındaǵı tariyxıy shıǵıp sóylegen sózi hám onda alǵa qoyılǵan baslamalar birinshi gezekte mámleketimizdiń rawajlanıwına jańa qádem beriwi menen birge, insaniyat aldında turǵan áhmiyetli mashqalalardı sheshiwde nátiyjeli sheshimler usınıs etetuǵının atap ótiw kerek.

ÓzA