Jańa párman

Ózbekstan Respublikası Prezidentiniń 2025-jıl 4-oktyabrde “Respublika atqarıwshı hákimiyat uyımlarınıń jumısına sanlastırıwdı keńnen engiziw esabınan basqarıw shtat birlikleriniń sanın optimallastırıw ilajları haqqında”ǵı pármanı qabıl etildi.
Hújjetke bola, endi mámleketlik uyımlarda sanlastırıw arqalı artıqsha jumıs orınları qısqartıladı.
Jámi 2141 shtat birligi saplastırıladı. Eń úlken ózgerisler tómendegishe.
Salıq komitetinde 498, Suw xojalıǵı ministrliginde 224, Awıl xojalıǵı ministrliginde 200, Bántlik ministrliginde 163 lawazım qısqaradı.
Sonday-aq, hár qıylı komitet hám agentliklerdegi 16 orınbasar lawazımı da saplastırıladı.
Endi sanlastırıw kúsheyedi. Kóp jumıslar elektron tárizde, jasalma intellekt imkaniyatlarınan paydalanǵan halda orınlanadı.
Usı jerde soraw tuwıladı. Shtatı qısqarǵanlar endi ne qıladı?
Hújjette bul sorawǵa juwap bar. Pármanda anıq jazılǵan – hesh kim járdemsiz qalmaydı. Huqıqlar buzılmaydı, hámmesi miynet nızamshılıǵına muwapıq ámelge asırıladı. Qullası, “jumıstan bosatıldı – tamam” degen gáp joq.
Kámbaǵallıqtı qısqartıw hám bántlik ministrligi kásiplik awqamları menen birge bul xızmetkerlerge jańa jumıs tabıwda járdem beredi.
Bul ne degeni? Yaǵnıy, kimdur basqa shólkemge ótedi, kimgedur qayta oqıw yamasa qánigeligin arttırıw usınıs etiledi. Jáne birew bolsa pútkilley jańa tarawda ózin sınap kóredi.
Bul jerde mámlekettiń maqseti adamdı jumıssız qaldırıw emes. Tiykarǵı niyet nátiyjesiz orında bánt bolǵan qánigeni nátiyje beretuǵın sistemaǵa baǵdarlaw bolıp tabıladı.

Ikrom AVVALBOEV, ÓzAnıń xabarshısı