Ózbekstan hám Qıtay arasındaǵı strategiyalıq birge islesiw sońǵı jıllarda barlıq tarawlarda úzliksiz rawajlanbaqta.
Prezident Sh.Mirziyoev atap ótkenindey, «Qıtay menen birge islesiw – mámleketimizdiń rawajlanıwı hám regionallıq turaqlılıqtı támiyinlewde áhmiyetli tiykar». Usı proceste bilimlendiriw hám ilim tarawındaǵı múnásibetler de jańa basqıshqa kóterilmekte.
Ájiniyaz atındaǵı Nókis mámleketlik pedagogikalıq institutında institut rektoratı menen Qıtay Xalıq Respublikasınıń abıraylı «Yinghua Academy» xalıqaralıq mektebiniń bas direktorı Lin Xianyan hám usı oqıw ornınıń insan resursları, sonday-aq, xalıqaralıq almasıw hám sırtqı isler boyınsha qánigesi Jou Yan arasında ótkerilgen ushırasıw usı procestiń jedellesiwinde jáne bir basqısh boldı.
Ilajda eki tárepleme birge islesiwdi rawajlandırıw, bilimlendiriw procesinde aldınǵı sırt el tájiriybelerin óz ara almasıw hám professor-oqıtıwshılar, studentler ushın xalıqaralıq baǵdarlamalar sheńberinde jańa imkaniyatlar jaratıw máseleleri dodalandı.
Ushırasıw dawamında tárepler oqıw baǵdarlamaları, akademiyalıq almasıw, professor-oqıtıwshılardıń qánigeligin jetilistiriw, shet tillerin oqıtıw metodikasın jetilistiriw sıyaqlı baǵdarlarda birge islesiw baylanısların keńeytiw boyınsha usınısların bildirdi.
«Yinghua Academy» wákilleri instituttaǵı bilimlendiriw ortalıǵı hám jaratılǵan sharayatlardı joqarı bahalap, aldaǵı waqıtta óz ara tájiriybe almasıw baǵdarlamaların jolǵa qoyıw niyetin bildirdi.
Ushırasıw sońında tárepler óz ara birge islesiwdi bunnan bılay da bekkemlew hám qospa joybarlardı ámelge asırıw boyınsha kelisip aldı.
Qaraqalpaqstan xabar agentligi.