Huqıqıy qatnas

Bizge belgili, Ministrler Kabinetiniń 2021-jıl 24-sentyabrdegi 605-sanlı qararına muwapıq, jataqxana menen qamtıp alınbaǵan hám ózine yamasa ata-anasına (nızamlı wákillerine) tiyisli bolmaǵan turaq jayda ijara huqıqı tiykarında jasaytuǵın mámleketlik joqarı bilimlendiriw mákemeleri studentleriniń aylıq ijara tóleminiń bir bólegin Ózbekstan Respublikası Mámleketlik byudjetinen qaplap beriw tártibi belgilengen.
Studentlerge aylıq ijara tóleminiń bir bólegin qaplap beriw tártibi qanday?
Tashkent mámleketlik yuridikalıq universiteti Yuridikalıq klinika baslıǵı Otabek Narziev bul boyınsha tómendegilerdi málim etti:
– Ijara tóleminiń bir bólegi qaplap beriliwi ushın student mámleketlik JOOnıń studenti bolıwı, jataqxana menen támiyinlenbegen bolıwı, ózine yamasa ata-anasına tiyisli bolmaǵan úyde ijarada turıwı, Ózbekstan puqarası yamasa respublikada turaqlı jasap atırǵan puqaralıǵı bolmaǵan shaxs bolıwı, sonıń menen birge, joqarı bilimlendiriwdiń kúndizgi formasında oqıp atırǵan bolıwı kerek.
Bunda dizimge alınǵan turaqlı jasaw rayonı yamasa qalasınan basqa jerde jasap atırǵan bolıwı áhmiyetli.
Tólem processlerine studenttiń mámleketlik grant yamasa tólemli kontrakt tiykarında oqıp atırǵanınıń parqı joq.
Hár ay ushın Tashkent qalasında BEMniń bir esesi – 412 mıń sum, basqa aymaqlarda BEMniń yarım esesi – 206 mıń sum beriledi.
Bul tólem 1-kurslarǵa sentyabr hám oktyabr ayları ushın ijara shártnamasız, qalǵan aylarǵa bolsa ijara shártnaması tiykarında tólep beriledi. Qalǵan kurs studentlerine tek ǵana ijara shártnaması tiykarında tólep beriledi.
Sonday-aq, bul tólemler, komissiyanıń juwmaǵına bola, sociallıq járdemge mútáj bolǵan studentlerge, órnek kórsetken hám belsendi studentlerge birinshi gezekte tólep beriledi.

Gulnoza Boboeva, ÓzA