Usı jıldıń 27-sentyabr – 3-oktyabr kúnleri aralıǵında jas óspirimler, jaslar hámde eresek sportshılar arasında Yaponiya paytaxtı Tokio qalasında shotokan karate-do boyınsha 17-jáhán chempionatı bolıp ótti.

Bul chempionatqa dúnyanıń 30 dan aslam mámleketleriniń eń kúshli sportshıları qatnastı. Keskin bellesiwlerge tolı bolǵan jarısta Ózbekstan Respublikası saylandı komandası quramında qaraqalpaqstanlı 5 sportshı óz sheberliklerin kórsetip, tórt altın, eki gúmis hám eki qola medalların jeńip alıwǵa miyasar boldı.
Atap aytqanda, ótkerilgen jarıs juwmaǵında E.Umarova, A.Quatbaeva M.Imamatdinova, K.Baxtiyarova hám J.Imamatdinovlar jeńimpazlıqtı qolǵa kirgizdi.
– Shákirtlerimniń qolǵa kirgizgen tabısınan oǵada quwanıshlıman, -deydi trener Aziz Aliev. – Jáhán chempionlıǵın qolǵa kirgiziw ańsat bolmadı. Sportshılar menen alıp barǵan shınıǵıwlarımızdıń arqasında usınday úlken nátiyjege eristik. Sonıń ishinde bizlerdi hár tárepleme qollap-quwatlaǵan respublikamız basshılarına, sport ministrligi hám basqa da qáwender shólkemlerge ayrıqsha raxmet aytaman.
Usı múnásibet penen Nókis xalıqaralıq aeroportında Qaraqalpaqstan Respublikası sport ministrligi, Ózbekstan Respublikası Karate-do federaciyasınıń Qaraqalpaqstan bólimi tárepinen saltanatlı ilaj shólkemlestirildi.
Onda Qaraqalpaqstan Respublikası sport ministriniń orınbasarı A.Qalbaev, Nókis rayonı hákimi Z. Zaytov hám basqalar shıǵıp sóylep, sportshılardı qolǵa kirgizgen tabısları menen qutlıqlap, olarǵa ózleriniń eń jaqsı tileklerin bildirdi.

Adilbay Orazov,
Qaraqalpaqstan xabar agentligi sholıwshısı.