Nókis qalasında “Oraylıq Aziya pedagogları – bir region, bir hawaz, bir kúsh” súreni astında Oraylıq Aziya pedagogları xalıqaralıq forumı bolıp ótti.

Mektepke shekemgi hám mektep bilimlendiriwi ministrligi tárepinen YuNESKO hám YuNISEF xalıqaralıq shólkemleri menen birgelikte shólkemlestirilgen bul forumǵa Oraylıq Aziya mámleketleri (Ózbekstan, Qazaqstan, Qırǵızstan, Tájikstan, Túrkmenstan) bilimlendiriw ministrlikleri, atap aytqanda Ázerbayjan hám Túrkiya mámleketleriniń bilimlendiriw sisteması xızmetkerleri, pedagoglar hám keń jámiyetshilik wákilleri qatnastı.
Xalıqaralıq forum Oraylıq Aziya mámleketleri arasında bilimlendiriw tarawındaǵı birge islesiwdi bekkemlew, pedagoglar ushın tájiriybe almasıw platformasın jaratıw hám regionallıq bilimlendiriw sistemasın rawajlandırıw maqsetine qaratıldı.
Forumnıń ashılıw máresimi hám jalpı májilis ilajı Nókis qalasında jaylasqan “Aq qus” kompleksinde bolıp ótti. Onda shıǵıp sóylegen mámleketimiz hám Oraylıq Aziya mámleketleriniń bilimlendiriw tarawınıń basshıları hám xalıqaralıq shólkemlerdiń wákilleri forumnıń áhmiyeti hám regionallıq birge islesiwdi keńeytiwdegi ornı haqqında sóz etti.
Qatnasıwshılar ushın “Ekologiyalıq bilimlendiriwde zamanagóy texnologiyalar” atamasında seminarlar shólkemlestirildi. Onda ekologiyalıq tárbiya processlerine interaktiv metodlardı engiziw, sanlı platformalar járdeminde balalarda tábiyatqa sanalı qatnas jasawdı qáliplestiriwdiń nátiyjeli kózqarasları haqqında pikir bildirildi. Qatnasıwshılar itibarına videosabaqlar, mobil qosımshalar hám virtual laboratoriyalar tiykarında islep shıǵılǵan jańa metodikalıq qollanbalar kórsetildi. Ámeliy bólimde pedagoglar ekologiyalıq tájiriybelerdi shólkemlestiriw boyınsha interaktiv shınıǵıwlarǵa qatnastı.
Forum sheńberinde Taxtakópir rayonındaǵı “Qara tereń” turistlik orayında ekologiyalıq hám etno-mádeniy ilajlar shólkemlestirildi. Qatnasıwshılarǵa Ámiwdárya átirapındaǵı ekosistemanıń ózgeshelikleri, shól hám dala aymaqlarındaǵı siyrek ushırasatuǵın ósimlik hám haywanat dúnyası haqqında keń maǵlıwmat berildi hám tábiyǵıy resurslardan aqılǵa uǵras paydalanıw boyınsha usınıslar berildi.
Ilajdıń mádeniy bóliminde dástúriy qaraqalpaq úrp-ádetlerine tiykarlanǵan etno-mádeniy baǵdarlamalar kórsetildi. Miymanlar milliy nama-qosıqlar, ayaq oyınlar hám ónermentshilik kórgizbesi arqalı aymaqtıń bay mádeniy miyrası menen jaqınnan tanısıw imkaniyatına iye boldı.
Sonday-aq, Nókis qalasındaǵı Prezident mektebinde zamanagóy oqıtıw metodikası boyınsha sektor májilisi ótkerildi. Tariyxıy muzeylerge barıw hám “Máńgi doslıq” temasındaǵı mádeniy baǵdarlama miymanlarda úlken tásir qaldırdı.

Maqset HABIBULLAEV, ÓzA