Qońırat rayonı hákimliginde rayon hákimi B.Madaminov hám Mámleketlik qáwipsizlik xızmetiniń Qaraqalpaqstan Respublikası basqarması baslıǵınıń orınbasarı K.Bayzakovtıń basshılıǵında kásiplik bilimlendiriw mákemeleriniń basshıları hám isbilermenlerdiń qatnasıwında ushırasıw bolıp ótti.

Maqset – endigi jıldan baslap jaslardı miynet bazarında talap joqarı bolǵan kásiplerge oqıtıw, maman kadrlardı tayarlaw hám olardı jumıs penen támiyinlewden ibarat.
Ushırasıw dawamında isbilermenler óz jumıslarında talap joqarı bolǵan qánigelikler haqqında aytıp, ózlerine zárúr bolǵan kadrlardı tayarlaw boyınsha usınıslar bildirdi.
Sonday-aq, jaslardıń bazar ekonomikası talaplarına sáykes kásiplerdi iyelewi, olardı jumısqa ornalastırıw hám qosımsha jeńillikler jaratıw boyınsha anıq ilajlar dodalandı.
Ilajda bunday ushırasıwlardıń áhmiyeti atap ótilip, bilimlendiriw mákemeleri hám isbilermenler arasındaǵı birge islesiwdi bunnan bılay da bekkemlew, jaslardıń kásip-óner iyelewi hám keleshekte múnásip jumıs orınlarına iye bolıwı ushın barlıq sharayatlar jaratılatuǵını málim etildi.
Qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi