Mámleketimiz paytaxtında “Oraylıq Aziyada ishimlik suw támiynatı hám aqaba suw xızmetleri” temasında xalıqaralıq konferenciya bolıp ótti.

Bul haqqında senat.uz xabar bermekte.
«Ilajǵa ministrlikler hám uyımlardıń basshıları, qánigeler hám ilimiy topar wákilleri qatarında Senattıń Agrar, suw xojalıǵı máseleleri hám ekologiya komiteti baslıǵınıń orınbasarı Sayyora Abdikarimova da qatnastı.
Konferenciyada suw támiynatı hám kanalizaciya sistemalarınıń turaqlılıǵın támiyinlew, olardıń nátiyjeliligin arttırıw, sanlı sheshimlerdi úyreniw hám aktivlerdi basqarıw processlerin jetilistiriw máselelerine ayrıqsha itibar qaratıldı.
Atap aytqanda, suw támiynatı sistemalarında basımdı basqarıw texnologiyaların joybarlastırıw hám engiziw, sonday-aq, ishimlik hám aqaba suwlardı tazalaw xızmetlerin kórsetiwde aldınǵı texnologiyalardan paydalanıw boyınsha xalıqaralıq tájiriybe almasıw zárúr ekenligi atap ótildi.
Bunnan tısqarı, xızmetler kólemin keńeytiw hám nátiyjeliligin arttırıw ushın investiciyalardı strategiyalıq hám maqsetli rejelestiriw, tarawǵa jas qánigelerdi tartıw jáne olardı xoshametlew máseleleri dodalaw orayında boldı. Suw tarmaqların monitoring etiw, maǵlıwmatlardı tallaw hám nátiyjelilikti arttırıwda “aqıllı texnologiyalar”dan paydalanıwdıń áhmiyetli ekenligi atap ótildi.
Qánigelerdiń tarawda alıp barılıp atırǵan jumıslar, bar mashqalalar hám olardıń sheshimlerine baǵıshlanǵan bayanatları tıńlandı, sonday-aq, sistemanı bunnan bılay da jetilistiriw boyınsha usınıslar berildi», delinedi xabarda.

Qaraqalpaqstan xabar agentligi