CHexiyanıń Brno qalasında ótkerilip atırǵan “MSV-2025” xalıqaralıq sanaat kórgizbesinde Ózbekstanda islep shıǵarılǵan sanaat ónimleri kórsetilmekte.

Bul kórgizbege Ózbekstan texnikalıq jaqtan tártipke salıw agentliginiń direktorı Akmal Jumanazarov basshılıǵındaǵı delegaciya aǵzaları da qatnaspaqta.
Atap ótiliwinshe, 140 kvadrat metr maydan tańlap alındı hám stendler qurılıp, barlıq zárúr ilajlar kórildi. Kórgizbe sheńberinde 100 ge shamalas sırt el kompaniyaları menen B2B ushırasıwları, investiciyalıq joybarlar hám eksport shártnamaların dúziw boyınsha sóylesiwler ótkeriw rejelestirilgen.
Kórgizbede “Made in Uzbekistan” brendi astında ónim islep shıǵarıp atırǵan hám sırt elge, sonıń ishinde, GSP+ talabı tiykarında Evropa mámleketlerine eksport etiw jumısın ámelge asırıp atırǵan jámi 66 jergilikli kárxana tańlap alındı.
Xalıqaralıq kórgizbede elektrotexnika sanaatı, qurılıs materialları, avtomobil qurılısı, ximiya sanaatı, IT málimleme texnologiyaları, taw-kán sanaatı hám metallurgiya tarawlarında islep shıǵarılıp atırǵan ónimler kórsetilmekte.
“MSV-2025” xalıqaralıq sanaat kórgizbesinde jergilikli kárxanalardıń belsene qatnasıwı úlken áhmiyetke iye. Atap aytqanda, Ózbekstan Respublikasınıń sırt mámleketler menen sawda-ekonomikalıq hám investiciyalıq birge islesiwin jáne de keńeytiw, sonday-aq, “Made in Uzbekistan” brendi astındaǵı ónimler menen sırt el isbilermenlerin tanıstırıw, sırt mámleketlerdiń texnikalıq jaqtan tártipke salıw, muwapıqlıqtı bahalaw, standartlastırıw hám metrologiya tarawlarında birge islesiwdi jolǵa qoyıw, jergilikli standartlardı sırt el standartları menen úylestiriw sıyaqlı imkaniyatlardı beredi.

Shahnoza Mamaturopova, ÓzA