Prezidentimizdiń 2025-jıl 30-iyuldegi «Xalıqaralıq shártnamaǵa qosılıw haqqında»ǵı qararına muwapıq, Ózbekstan 2013-jılı Minsk qalasında qol qoyılǵan Korrupciyaǵa qarsı gúresiw boyınsha mámleketleraralıq keńesti dúziw haqqındaǵı kelisimge rásmiy qosıldı.

Qararǵa muwapıq, bul xalıqaralıq shártnamanı ámelge asırıw boyınsha juwapker uyım sıpatında Korrupciyaǵa qarsı gúresiw agentligi belgilengen. Armeniya, Belarus, Qazaqstan, Qırǵızstan, Rossiya hám Tájikstannıń korrupciyaǵa qarsı uyımlarınıń basshıları keńes aǵzaları esaplanadı.
Korrupciyaǵa qarsı gúresiw boyınsha mámleketleraralıq keńestiń 10-májilisi Armeniyanıń Erevan qalasında shólkemlestirildi. Onda Korrupciyaǵa qarsı gúresiw agentliginiń direktorı Akmal Burhonov basshılıǵındaǵı Ózbekstan delegaciyası da qatnastı.
Bul májiliste Ózbekstan delegaciyasınıń qatnasıwı shólkemniń tolıq aǵzası sıpatındaǵı dáslepki qatnasıwı boldı. Sapardan tiykarǵı maqset – mámleketleraralıq keńestiń jumısı sheńberinde regionda korrupciyaǵa qarsı gúresiw tarawındaǵı áhmiyetli mashqalalar, baslamalar hám strategiyalıq baǵdarlardı dodalaw jáne ámeliy birge islesiwdi kúsheytiwden ibarat.
Keńes májilisi sheńberinde Ózbekstan delegaciyasınıń basshısı Prezident Shavkat Mirziyoevtiń basshılıǵında mámlekette ámelge asırılıp atırǵan korrupciyaǵa qarsı reformalar, milliy hám regionallıq baslamalar jáne xalıqaralıq birge islesiw nátiyjeliligin atap ótip, keńes jumısında belsene qatnasıw, arttırılǵan tájiriybe menen ortaqlasıw hám jańa birgeliktegi baslamalardı qollap-quwatlawǵa tayar ekenin bildirdi.
Keńes májilisinde virtual valyutalardıń nızamsız aylanısına qarsı gúresiw, korrupciya ushın yuridikalıq táreplerdiń juwapkershiligi, korrupciyadan jıraq biznes ortalıǵın jaratıw sıyaqlı bir qatar áhmiyetli máseleler dodalandı.
Sapar sheńberinde Agentlik delegaciyası bir qatar sırt el wákillikli uyımları menen eki tárepleme ushırasıwlar ótkerdi. Sonıń ishinde, Armeniya Bas prokurorı Anna Vardapetyan menen bolıp ótken ushırasıwda eki mámleket arasında korrupciyaǵa qarsı gúresiw boyınsha óz-ara paydalı birge islesiw baylanısların jolǵa qoyıwǵa kelisip alındı.
Sonday-aq, Korrupciyaǵa qarsı gúresiw agentligi hám Belarus Respublikası Bas prokuraturası arasında birge islesiw hújjetine qol qoyıldı.
Bul hújjet huqıqıy málimlemeler almasıwı, ilimiy-metodikalıq usınıslar islep shıǵıw, korrupciyanıń sebep hám sharayatların anıqlaw hám olardı saplastırıw, mápdar shasxlar jumısında hadallıq hám ashıq-aydınlıqtı támiyinlew sıyaqlı baǵdarlarda óz-ara birge islesiwdi názerde tutadı.

N.Abduraimova, ÓzA