Nókis qalasında Qaraqalpaqstan Respublikası Sport ministrligi, Ózbekstan jeńil atletika federaciyası Qaraqalpaqstan bólimi, Uzbekneftegaz hám ProRun shólkemleriniń qáwenderliginde «NUKUS Half Marathon» juwırıw marafonı hám juwırıw boyınsha Qaraqalpaqstan chempionatı bolıp ótti.

Jarısqa elimizdiń barlıq aymaqlarınan  sportshılar qatnasıp, 5 hám 21 km aralıqqa juwırıw boyınsha óz-ara bellesti.

Keskin ótken jarıs juwmaǵında, 5 km aralıqqa qızlar arasında ótkerilgen jarısta Marjona  Saydullaeva birinshi orındı jeńip alǵan bolsa, Muxayyo  Maxammadjanova  hám Dinora  Ozodovalar gúmis hám qola medalların qolǵa kirgizdi.

Erler arasında ótkerilgen jarısta Behruz  Shavkatov báygige birinshi bolıp jetip kelgen bolsa, Vohid  Iskandarov  hám Shoxjaxon  Xayrullaevlarǵa ekinshi hám úshinshi orınlar nesip etti.

21 km aralıqqa juwırıw jarısı da oǵada qızıqlı ótip, onda qızlar arasında 1 saat 16 minut 28 sekund nátiyje kórsetken Sadafbonu Nusratilloeva altın, 1 saat 16 minut 46 sekund nátiyjege erisken Shoxsanam Xuramova gúmis hám 1 saat 26 minut 37 sekund nátiyje menen Sabrinabonu Komilova qola medalın jeńip aldı.

Al, erler arasında Bekzod Boymatov birinshi, Ruslan Xodjaev ekinshi hám Hasan Sadritdinovlar  úshinshi orınlardı iyelewge eristi.

Juwırıw boyınsha ótkerilgen Qaraqalpaqstan chempionatında qızlar arasında Ejemiya  Bazarbaeva altın, Ramila  Navruzbaeva gúmis hám Shaxsánem  Arzekeeva qola medalına ılayıq dep tabıldı.

Erler arasında 1 saat 9 minut 59 sekund nátiyje kórsetken Rashidbek  Iskandarov  birinshi, 1 saat 16 minut 28 sekund kórsetkishke iye Yuldoshboy  Satimbaev ekinshi, 1 saat 16 minut 28 sekundta báygige jetip kelgen Quwat  Abdimuratov úshinshi orındı qolǵa kirgizdi.

Ilajda Qaraqalpaqstan Respublikası Sport ministri E Qutıbaev barlıq qatnasıwshılardı jarısqa qatnasqanı menen qutlıqlap, jeńimpazlardı shólkemlestiriwshiler tárepinen tayarlanǵan arnawlı diplom, medal, aqshalay sıylıq hám estelik sawǵalar menen sıylıqladı.

Adilbay Orazov,

Qaraqalpaqstan xabar agentligi sholıwshısı