Elektr energiyası, ishimlik suwı hám tábiyǵıy gaz kúndelikli turmısımızda paydalanatuǵın eń zárúrli derekler. Olardı ısırap qılmastan aqılǵa uǵras paydalanıw, energiya resursları ushın tólemlerdi óz waqtında ámelge asırıw tutınıwshılarǵa tawsılmastay bolıp kórinetuǵın baylıqlardı únemlewde úlken áhmiyetke iye. Biraq ayırım fizikalıq hám yuridikalıq shaxslardıń paydalanılǵan energiya resursları ushın tólemlerdi óz waqtında ámelge asırmawı iri muǵdardaǵı qarızdarlıqtı keltirip shıǵarmaqta. Bul jaǵday sudlarda sheshimin tawıp, qarızlar májbúriy orınlaw byurosı uyımları arqalı óndirilmekte.
Májbúriy orınlaw byurosı Qaraqalpaqstan Respublikası basqarması hám onıń aymaqlardaǵı bólimleri tárepinen bul baǵdarda bir qatar ilajlar ámelge asırılmaqta.
Atap aytqanda, bıyılǵı jılı ishimlik suwı hám energiya resurslarınan qarızdarlıqlardı óndiriw boyınsha 24,7 milliard sumlıq 4 mıń 765 orınlaw hújjeti kelip túsken bolıp, orınlaw háreketleri dawamında 4 mıń 176 orınlaw hújjeti tamamlanıp, 14,4 milliard sumlıq qarızdarlıqlar óndirilgen.
Qaldıqtaǵı orınlaw hújjetleri boyınsha jámi 62,2 million sumlıq bir kóshpes múlk elektron onlayn aukcionǵa shıǵarılǵan.
Sonday-aq, 239,8 million sumlıq 51 orınlaw hújjeti boyınsha óndiriw qarızdarlardıń miynet haqısına qaratılǵan hám 19,9 million sumlıq 5 qarızdardıń sırt elge shıǵıw huqıqları sheklengen.
Orınlaw hújjeti talapların orınlamaǵan 22 qarızdarǵa 42,5 million sum muǵdarında hákimshilik járiymalar qollanıldı.
Házirde tutınıwshılardıń energiya resurslarınan payda bolǵan qarızdarlıqların óndiriw ilajları dawam etpekte.

Qaraqalpaqstan xabar agentligi.