Prezident Shavkat Mirziyoev 6-oktyabr kúni elimizde jasalma intellekt texnologiyaların rawajlandırıw hám olardı ekonomika hám sociallıq tarawlarǵa keńnen engiziw boyınsha prezentaciya menen tanıstı.

Búgingi kúnde dúnyada jasalma intellekt texnologiyaları ekonomika, bilimlendiriw, densawlıqtı saqlaw, qáwipsizlik hám basqa da áhmiyetli baǵdarlarda tiykarǵı qurallardan birine aylanbaqta. Jasalma intellekt texnologiyaları mámleketlik basqarıwda nátiyjelilikti arttırıw, resurslardan únemli paydalanıw, xalıqqa kórsetiletuǵın xızmetlerdiń sapasın jaqsılawǵa xızmet etedi.
Sońǵı jılları Ózbekstanda da bul tarawda sistemalı reformalar ámelge asırılıp, mámleketimiz jasalma intellektti engiziw boyınsha xalıqaralıq reytingte 17 tekshe joqarıladı. Házirgi waqıtta Ózbekstan 188 mámleket ishinde 70-orındı, Oraylıq Aziya boyınsha bolsa birinshi orındı iyelep tur.
Prezidentimizdiń atap ótkenindey, bul nátiyjeler tarawda qoyılǵan dáslepki qádemlerdiń nátiyjesi, biraq aldında ele kóp jumıs tur. Usı maqsette ótken jılı 2030-jılǵa shekem mólsherlengen Jasalma intellektti rawajlandırıw strategiyası qabıl etildi hám Sanlı texnologiyalar ministrligi janında arnawlı oray shólkemlestirildi.
Prezentaciyada tarawdı rawajlandırıwdıń tiykarǵı baǵdarları kórip shıǵıldı.
Ekonomika hám sociallıq tarawlarda jasalma intellekt joybarların engiziw maqsetinde 50 million dollar qarjı ajıratılǵan. Densawlıqtı saqlaw, bilimlendiriw, awıl xojalıǵı, energetika, transport, ekologiya hám qarjı tarawların qamtıp alǵan 86 joybar qáliplestirildi. Házirgi kúnde jasalma intellektti qollanıw ushın zárúr esaplaw imkaniyatların jaratıw maqsetinde “superkompyuter klasteri”n shólkemlestiriw jumısları jedel alıp barılmaqta.
– Jasalma intellektti tezirek rawajlandırıw ushın turaqlı túrde aldınǵı, ózin aqlaǵan sırt el hám jergilikli tájiriybelerdi úyrenip barıw zárúr. Onıń ushın tarawda nátiyjeli jumıs alıp barıp atırǵan watanlaslarımız, sırt elli ekspertler hám jeke menshik sektor menen tıǵız birge islesiwdi jolǵa qoyıw kerek, – dedi mámleketimiz basshısı.
Prezentaciyada jasalma intellekt tarawında zamanagóy esaplaw quwatlıqların ózimizde jaratıw, maǵlıwmatlar orayların qurıw hám oǵan investiciya kirgizbekshi bolǵan isbilermenler ushın tartımlı ortalıqtı támiyinlew zárúr ekenligi atap ótildi.
Jasalma intellektti rawajlandırıwda eń áhmietli faktor – maman kadrlar tayarlaw. Bul jumıslardı mekteplerden baslaw, informatika muǵallimlerin qayta tayarlaw, jańa áwlad sabaqlıqların islep shıǵıw zárúr ekenligi atap ótildi.
Tarawda kadrlar tayarlawdı jedellestiriw maqsetinde kóplegen baǵdarlamalar ámelge asırılmaqta. “Bir million jasalma intellekt jetekshileri” milliy baǵdarlaması sheńberinde jaslar ushın aistudy.uz hám omp.aistudy.uz platformaları iske qosıldı, olarda JI boyınsha 5 biypul onlayn oqıw baǵdarlaması jolǵa qoyılǵan. Baǵdarlama sheńberinde 2027-jılǵa shekem 1 million jas jasalma intellekt tarawındaǵı bilim hám kónlikpelerge iye boladı.
Jaslardıń perspektivalı joybarların anıqlaw hám qollap-quwatlaw ushın barlıq aymaqlarda Jasalma intellekt xakatonı jolǵa qoyıladı. Búgingi kunde Nókis qalasında densawlıqtı saqlaw boyınsha “HealthTech AI Hackathon” jarısı tabıslı ótkerildi. Bul tájiriybeni keńeytip, bilimlendiriw, sud sisteması, suw xojalıǵı hám isbilermenlikti rawajlandırıw baǵdarlarında da ótkeriw áhmiyetli ekenligi atap ótildi.
Prezidentimiz usınıs etilgen ilajlardı qollap-quwatlap, olardı jasalma intellektti engiziwdi bunnan bılay da jedellestiriw, aldıńǵı tájiriybeni ámeliyatqa engiziw, tarawda kadrlar potencialın arttırıw baǵdarında bunnan bılay da jetilistiriw hám keńeytiw boyınsha tapsırmalar berdi.

ÓzA