Qazaqstannıń Aqmola wálayatı Burabay qalasında Qazaqstan Oraylıq saylaw komissiyasınıń basshılıǵında ǴMDAǵa aǵza mámleketler saylaw uyımları basshıları Másláhát keńesiniń altınshı májilisi bolıp ótti.

Onda Ózbekstan Respublikası Oraylıq saylaw komissiyasınıń Baslıǵı basshılıǵındaǵı delegaciya wákilleri qatnastı. Bul haqqında Oraylıq saylaw komissiyasınıń málimleme xızmeti xabar berdi.
Májiliste Másláhát keńesiniń aǵzaları – Armeniya, Belarus, Qazaqstan, Qırǵızstan, Rossiya Federaciyası, Ózbekstan hám Tájikstan oraylıq saylaw uyımlarınıń basshıları, sonday-aq, másláhát dawısı huqıqı menen ǴMDA Atqarıw komiteti hám ǴMDA PA Sekretariatınıń wákilleri qatnastı.
Másláhát keńesiniń aǵzaları 2026-jılı Armeniya Respublikasında bolıp ótetuǵın parlamentlik saylawlar múnásibeti menen saylaw nızamshılıǵındaǵı jańalıqlar, Qazaqstan Respublikasında jergilikli saylawlar hám siyasiy sistemanı bunnan bılay da jetilistiriw, Qırǵız Respublikasında 2025-jılı ótkerilgen saylaw processleri, Rossiya Federaciyasında 2025-jıl 14-sentyabrde ótkerilgen ulıwma dawıs beriw kúniniń juwmaqları, Tájikstan Respublikasında jergilikli xalıq deputatları májilisleriniń quramınan shıǵıp ketken deputatlardıń ornına ótkerilgen saylawlar haqqındaǵı bayanatlardı tıńladı.
Ózbekstan Respublikası Oraylıq saylaw komissiyasınıń Baslıǵı mámlekette 2024-jılı parlament hám jergilikli mámleketlik hákimiyat wákillikli uyımlarına ótkerilgen saylawlardan keyingi dáwirde OSK jumısınıń ayırım tárepleri boyınsha maǵlıwmat berdi.
Atap ótilgenindey, saylawdan keyingi dáwirde xalıqaralıq baqlawshılar usınǵan esabatlar, pikir-usınıslardı tereń tallaw saylaw uyımlarınıń tiykarǵı wazıypası bolıp esaplanadı. Bul tallaw saylaw procesiniń xalıqaralıq standartlarǵa muwapıqlıǵın bahalaw, sonday-aq, optimallastırıw hám jetilistiriw múmkin bolǵan tarawlardı anıqlawǵa qaratılǵan.
Hár bir ótken saylawlardı baqlaǵan xalıqaralıq missiyalardıń juwmaqlawshı hújjeti boyınsha ámeldegi nızamshılıqtı túsindirgen halda sholıwlar tayarlanadı. Sonıń menen birge, xalıqaralıq ámeliyat, sonıń ishinde, xalıqaralıq saylaw standartları, huqıqıy baza hám sırt mámleketlerdiń tájiriybesi tallanadı. Nátiyjede olardı ámelge asırıw boyınsha kóriliwi múmkin bolǵan yamasa qabıl etilgen ilajlar, saylawlardıń shólkemlestiriwshilik-huqıqıy tiykarların bunnan bılay da jetilistiriw baǵdarları sáwlelengen “Jol kartası” islep shıǵıldı.
Usı ánjuman sheńberinde “Saylaw procesi qatnasıwshılarınıń elektoral mádeniyatın qáliplestiriw” atamasında xalıqaralıq dógerek sáwbeti ótkerildi. Onda Ózbekstan OSK aǵzası G.Rahimova bayanat jasap, 2024-jılı Ózbekstanda parlamentlik hám jergilikli saylawlarǵa tayarlıq kóriw hám olardı ótkeriw procesinde Málimleme strategiyasın ámelge asırıwdıń tiykarǵı tárepleri haqqında maǵlıwmat berdi.
Sonday-aq, Másláhát keńesiniń ilajları sheńberinde onlayn formatta ǴMDAǵa aǵza mámleketlerdiń saylaw uyımları basshıları Másláhát keńesi janındaǵı saylaw tarawında jaslar siyasatı boyınsha jumısshı topardıń birinshi májilisi de bolıp ótti.
Bunnan tısqarı, ǴMDAǵa aǵza mámleketlerdiń saylaw uyımları tárepinen tayarlanǵan huqıqıy aǵartıwshılıq, saylawda qatnasıw mádeniyatın qáliplestiriw tarawındaǵı tájiriybelerdi sáwlelendiriwshi metodikalıq materiallar kórgizbesi shólkemlestirildi. Sonıń ishinde, Ózbekstan saylaw sistemasınıń rawajlanıw tariyxına baǵıshlanǵan “Saylawlar: keshe hám búgin” atamasındaǵı videofilm saylaw uyımlarınıń wákillerinde úlken qızıǵıwshılıq oyattı.

M.Komilova, ÓzA