Evropa Awqamı juwapkerleri “Dron diywalı” máselesi boyınsha májilis ótkerdi. Videokonferenciya túrinde shólkemlestirilgen májiliske Qorǵanıw hám kosmos boyınsha Evropa komissarı Andrius Kubilius basshılıq etken. “Evronyus” telekanalı bul haqqında xabar tarqattı.

Sóylesiwde EA quramındaǵı Bolgariya, Estoniya, Finlyandiya, Latviya, Litva, Polsha, Rumıniya sıyaqlı Rossiyaǵa jaqın jaylasqan mámleketlerdiń qorǵanıw ministrleri qatnasqan.
Aldın jıyınǵa qatnaspaytuǵının járiyalaǵan Vengriya hám Slovakiya da keyinirek sóylesiwge qosılǵan. Qatnasıwshılar Rossiyanıń ushıwshısız samolyotlarınan qorǵanıw boyınsha “baha, jawıngerlik sınaqtan ótken tájiriybe” menen ortaqlasqan Ukraina qorǵanıw ministri menen óz aldına májilis ótkerdi.
Usı tárizde mámleketler “Shıǵıs qanat baqlawı” joybarı boyınsha “Dron diywalı”na tiykarlanǵan kelisimge erisken. Sonday-aq, tárepler Ukraina menen birge bul qorǵanıw baslamasın ámelge asırıw boyınsha ulıwma kózqarastı qorǵawǵa kelisip alǵan.
Bizge belgili, búgingi kúnde drondı anıqlaw, baqlaw hám uslap alıwda aldıńǵı texnologiyadan paydalanıw ústinlikke iye bolmaqta. Usı kózqarastan “Dron diywalı”n jaratıw hám jerdegi qorǵanıw sisteması, sonıń ishinde, háreketsheńlikke qarsı imkaniyattı jaylastırıw máselesi de áhmiyetli. Sonıń menen birge, Baltıq boyı hám Qara teńizde qáwipsizlikti bekkemlew hám jaǵdaydan xabardarlıqtı arttırıw ushın kosmoslıq texnologiyadan paydalanıw teması da dodalaw orayına shıqpaqta.
Oktyabr ayında bolıp ótetuǵın Evropa keńesi májilisinde bul baslama tolıq dodalanıwı kútilmekte. Atap aytqanda, EA “Dron diywalı”n qarjılandırıw ushın arnawlı mexanizm jaratıw rejelestirilgen.

S.Rahimov, ÓzA