Búgin Nókis qalasında Salamatlıq marafonı baslandı. Kesellikler profilaktikası hám salamat turmıs tárizin úgit-násiyatlawǵa qaratılǵan bul akciya arqalı aymaqta jasawshı xalıq 31-oktyabrge shekem skrining hámde profilaktikalıq tekseriwler menen qamtıp alınadı.

Medicinalıq tekseriwler Qaraqalpaqstan medicina institutı klinikası hám bir waqıttıń ózinde Nókis qalasındaǵı 12 shańaraqlıq poliklinikada bolıp ótpekte.
Bul processke jergilikli shıpaker hám miyirbiykeler menen birge, Respublikalıq qánigelestirilgen medicina orayları hám bir qatar aldınǵı sırt el klinikalarınan jetekshi qánigeler tartılǵan.
Sonday-aq, 3 jámiyetlik orında shólkemlestirilgen «Salamatlıq maydanshaları»nda salamat turmıs tárizin úgit-násiyatlawǵa baylanıslı ilajlar, antropometriya, qan basımı hám puls ólshew sıyaqlı tekseriwler ámelge asırılmaqta.
Qaraqalpaqstan medicina institutı klinikasında bolıp ótken ashılıw máresiminde Qaraqalpaqstan Respublikası Ministrler Keńesiniń Baslıǵı F.Ermanov hám taraw juwapkerleri shıǵıp sóylep, bul akciya medicinanı xalıqqa jáne de jaqınlastırıw, aymaqta keselliklerdiń aldın alıw hám salamat turmıs tárizin úgit-násiyatlawǵa xızmet etetuǵının atap ótti.
Skrining tekseriwleri hám profilaktikalıq tekseriwler ótkeriletuǵın medicina mákemelerine mobil mammograflar, flyuorograflar, angiograf, UZI-apparatları hám oftalmologiyalıq toplamlar alıp kelinip ornatılǵan.
Klinikalıq hám bioximiyalıq laboratoriyalıq tekseriwler ushın barlıq zárúr úskeneler bar. Kerekli materiallardıń rezervi jaratılǵan.
Dáslep jergilikli medicina xızmetkerleri tárepinen xalıq profilaktikalıq tekseriw hám skrining tekseriwlerinen ótkerilmekte. Sozılmalı keselligi bar nawqaslar respublikanıń jetekshi qánigeleriniń tekseriwi hám joqarı texnologiyalıq tekseriwler ushın tańlap alınbaqta.
Bul basqıshta Qaraqalpaqstan medicina institutı klinikasında mobil hám stacionar úskeneler járdeminde instrumentallıq tekseriwler, selektiv skrining hámde sozılmalı keselligi bar xalıq ushın paytaxttan kelgen jetekshi qánigelerdiń qatnasıwında kórsetpe tiykarında qosımsha tekseriwler ámelge asırılmaqta.

Adilbay Orazov,
Qaraqalpaqstan xabar agentligi sholıwshısı.