Qaraqalpaqstan Respublikası Mektepke shekemgi hám mektep bilimlendiriw ministrliginde 1-oktyabr – «Muǵallimler hám ustazlar kúni» múnásibeti menen saltanatlı ilaj bolıp ótti.

Ilajda Qaraqalpaqstan Respublikası Mektepke shekemgi hám mektep bilimlendiriw ministri G. Kojabaeva taraw pidayıların bayram menen qutlıqladı hám sońǵı jılları bilimlendiriw tarawında júz berip atırǵan jańalanıwlar menen ózgerislerdi, qaraqalpaqstanlı oqıwshı hám muǵallimlerdiń qolǵa kirgizip atırǵan tabısları haqqında keń túrde aytıp berdi.
– Sizlerdiń tınımsız miynetińiz, pidayılıǵıńız, keleshegimiz bolǵan jas áwladtı tárbiyalawdaǵı xızmetlerińiz maqtawǵa ılayıq. Búgingi kúnde bilimlendiriw sistemasındaǵı reformalardıń tabıslı ámelge asırılıwı, bárinen burın, siz, áziz muǵallimlerdiń kúsh-ǵayratıńızǵa baylanıslı. Sizlerge bekkem densawlıq, turaqlı tabıslar, shańaraqlıq baxıt hám pedagogikalıq jumısıńızda tasqın tabıslar tileymen! – dedi ministr G.Kojabaeva.
Ilaj dawamında tarawda jemisli miynet etip atırǵan bir topar pidayı muǵallim hám ustazlarǵa “Ózbekstan Respublikası Xalıq bilimlendiriw pidayısı”, “Ózbekstan Respublikası Xalıq bilimlendiriw aǵlası” hám “Qaraqalpaqstan Xalıq bilimlendiriw aǵlası” kókirek belgileri saltanatlı túrde tapsırıldı.
– Búgin bilimlendiriw tarawındaǵı islegen xızmetlerim ministrlik basshıları tárepinen múnásip túrde xoshametlendi, – deydi sıylıqlanǵanlardıń biri Qońırat rayonındaǵı Bárkamal áwlad mektebiniń direktorı Munira Matmuratova. – Bunıń ushın taraw basshılarına úlken raxmet aytıp, aldaǵı waqıtları da oqıwshılardı zaman talabına say tárbiyalaw jolında ayanbastan xızmet ete beremiz dep xalqımızdı isendirip qalaman.

Adilbay Orazov,
Qaraqalpaqstan xabar agentligi sholıwshısı.