1-oktyabr – «Muǵallimler hám ustazlar kúni» múnásibeti menen Taxtakópir rayonı Mádeniyat orayında saltanatlı bayram ilajı bolıp ótti.

Bayram keshesine rayondaǵı mákeme-shólkem basshıları, deputatlar, taraw pidayıları hám jaslar qatnastı.
Ilajda Taxtakópir rayonı hákimi J.Adilov hám Ózbekstan Respublikası Oliy Majlisi Nızamshılıq palatasınıń deputatı B.Aldamuratovlar shıǵıp sóylep, muǵallim hám ustazlardı kásiplik bayramı menen qızǵın qutlıqladı hám sońǵı jılları elimizde Prezidentimiz basshılıǵında ámelge asırılıp atırǵan reformalar, aymaqlarda júz berip atırǵan jańalanıw hám ózgerislerdi úlken qanaatlanıwshılıq penen atap ótti.
Sońınan jas áwladtı tárbiyalaw, aǵartıwshılıqtı úgit-násiyatlaw hám bilimlendiriw tarawın rawajlandırıwda ayrıqsha belsendilik kórsetken bir topar pedagog-xızmetkerlerge rayon hákimligi tárepinen Húrmet jarlıǵı hám estelik sawǵaları tapsırıldı.
Bayram ilajı koncert baǵdarlaması menen kewilli dawam etti.
Usı kúni rayon hákimi Jambul Adilov 1-oktyabr – “Muǵallimler hám ustazlar kúni” bayramı múnásibeti menen mektep dáwirinde ózine tálim-tárbiya bergen ustazı Tazagúl Áshirbekovanıń shańaraǵına barıp, onı bayram menen qutlıqladı.
Bunnan soń rayon hákimi ustazı menen birgelikte A.Adilov APJ aymaǵındaǵı 7-sanlı ulıwma bilim beriw mektebiniń jámááti hám oqıwshıları menen ushırastı.
Ushırasıwda rayon hákimi mektepte oqıǵan dáwirlerin eske alıp oqıwshılar menen bólisti hám búgingi kúnde bilimlendiriw tarawında ámelge asırılıp atırǵan reformalar, oqıwshılardıń bilim alıwı ushın jaratılıp atırǵan imkaniyatlar haqqında aytıp ótti.
Ilaj sońında oqıwshılarǵa hár qıylı atamadaǵı kitaplar sawǵa etildi. Sonday-aq, ustaz hám shákirt birgelikte mektep aymaǵında sayamanlı hám miyweli terek nállerin egip, ulıwmaxalıqlıq iygilikli iske ózleriniń úlesin qostı.

Adilbay Orazov,
Qaraqalpaqstan xabar agentligi sholıwshısı.