Senattıń Ilim, bilimlendiriw hám densawlıqtı saqlaw máseleleri komitetiniń májilisinde “Sociallıq jumıs haqqında”ǵı nızam kórip shıǵıldı.

Nızamda sociallıq jumıs tarawındaǵı tiykarǵı túsinikler sáwlelendirilgen. Sociallıq jumıs tarawınıń tiykarǵı principleri, sociallıq jumıstı shólkemlestiriw, bul tarawdı tártipke salıw, sociallıq xızmetler hám sociallıq járdem, sociallıq xızmetler hám sociallıq járdem tarawındaǵı mámleketlik qadaǵalaw, sociallıq xızmetkerdiń huqıqları menen minnetlemeleri, sociallıq xızmetker jumısınıń kepillikleri belgilep berilgen.
Nızam boyınsha mápdar ministrlikler hám uyımlar jáne ekspertlerdiń usınısları tıńlandı. Tolıq úyreniwlerden soń komitet tárepinen tiyisli qarar qabıl etiliwine kelisip alındı.
Májiliste Tashkent wálayatında ulıwma bilim beriw mektepleriniń oqıwshıları ushın jaratılǵan sharayatlar, bilimlendiriwdiń sapasın arttırıw boyınsha belgilengen wazıypalardıń orınlanıwı boyınsha ótkerilgen úyreniw nátiyjeleri kórip shıǵıldı.
Maǵlıwmatlarǵa qaraǵanda, wálayatta házirgi kúnde 877 mámleketlik ulıwma bilimlendiriw mektebi jumıs alıp barmaqta. Olarda 568 mıńnan aslam oqıwshı bilim almaqta. 2025-jılı mektepti 34 mıń 720 oqıwshı tamamlaǵan bolıp, olardan 30 mıń 260ı mámleketlik joqarı bilimlendiriw mákemelerine hújjet tapsırıp, ortasha 76,9 ball nátiyje kórsetken.
Senatorlar bilimlendiriwdiń sapasın bahalawǵa qaratılǵan ilajlarda ayırım kemshiliklerge jol qoyılǵanın atap ótti. Atap aytqanda, 2025-jılı ótkerilgen pedagog kadrlar attestaciyasında oqıtıwshılardıń 852 siniń mamanlıq kategoriyası tómenlegen, 5 mıń 775 i bolsa belgilengen minimal ótiw balın toplay almaǵan. Sonday-aq, 2025-jılı oqıwshılardıń regionallıq hám xalıqaralıq olimpiadalardaǵı qatnasıwı respublikalıq kórsetkishtiń tek ǵana 2,5 procentin quraǵan (respublika boyınsha jámi medallar sanı – 195, Tashkent wálayatında bolsa 5).
Sonday-aq, wálayatta 158 ulıwma bilim beriw mektebi uzaq jıllardan berli mámleketlik baǵdarlamalar tiykarında tolıq ońlanbaǵan, 149 mekteptiń sport zalları ońlawǵa mútáj jaǵdayda bolsa, 174 mekteptiń sport zalları joq, 2 mıń 59 sport maydanshalarınıń 552 siniń jaǵdayı qanaatlandırarsız.
Dodalaw juwmaǵında anıqlanǵan mashqalalardı saplastırıwǵa qaratılǵan usınıslar islep shıǵıldı hám komitettiń tiyisli qararı qabıl etildi.

N.Abduraimova, ÓzAnıń xabarshısı