Qaraqalpaqstan Respublikası Qurılıs hám úy-jay kommunal xojalıǵı ministrligi «Zakovat intellektual klubı» mámleketlik emes, kommerciyalıq emes shólkemi menen birgelikte ministrliktiń jas qánigeleri arasında «Zakovat» oyının ótkerdi.

Xabarıńız bar, «Zakovat» intellektuallıq oyını Prezidentimizdiń 2021-jıl 21-yanvardaǵı qararı menen xalıq arasında ǵalabalıq-aǵartıwshılıq háreketke aylandırılıwı rejelestirilgen.
Nókistegi Jaslar orayında bolıp ótken «Zakovat»ta 7 komanda quramında respublikamızdıń qala hám rayonlarında xızmet etip kiyatırǵan 30 ǵa shamalas taraw xızmetkeri qatnastı. Qatnasıwshılar bilimge bolǵan ıqlasın kórsetti. Maqset logikalıq pikirlew hám komanda menen islesiw kónlikpelerin qáliplestiriwden ibarat.
– Jas xızmetkerlerimiz arasında olar menen islesiwdiń nátiyjeliligin arttırıw, tarawdaǵı sistemalı mashqalalardı saplastırıw, intellektuallıq ortalıqtı qáliplestiriw maqsetinde «Zakovat» jarısın ótkerip atırmız, -deydi Qaraqalpaqstan Respublikası Qurılıs hám úy-jay kommunal xojalıǵı ministrligi bas qánigesi Lalaxan Dáwletova. – Jeńimpaz bolǵan komandalarǵa ministrligimiz tárepinen sawǵalar inám etildi.
Bellesiw juwmaǵında joqarı orınlardı iyelegen «Doslıq», «Nukus city», «Arqa» komandaları diplom hám estelik sawǵaları menen sıylıqlandı. Conday-aq, «Eń bilimli topar», «Tapqırlar», «Eń belsendi topar», «Eń epshil topar» nominaciyaları boyınsha jeńimpazlar anıqlandı.

Qaraqalpaqstan xabar agentligi