Ferǵana wálayatında sporttıń qılıshlasıw túrinen 23 jasqa shekemgi sportshılar arasında Ózbekstan kubogi bolıp ótti.

Mámleketimizdiń barlıq aymaqlarınan kúshli sportshılar qatnasqan bul jarısta, respublikamız wákilleri bir qatar tabıslardı qolǵa kirgizdi. Atap aytqanda, erler arasında Azizbek Dawletnazarov barlıq qarsılasların jeńip shıǵıp, altın medal iyesine aylanǵan bolsa, Muhammedali Tursınbaev sıylı úshinshi orındı iyelewge eristi.

Al, qızlar arasında bellesiwlerde bolsa Nurhayat Kalniyazova finalǵa shekem jetip kelip, gúmis medaldı qolǵa kirgizdi.
Sonday-aq, bul jarısta komandalıq bellesiwler ótkerilip, onda respublikamızdıń erler komandası 3, qızlar komandası 2 komanda menen qatnastı. Keskin ótken bellesiwler sońında erler arasında Qaraqalpaqstan Respublikasınıń 3 komandası da altın, gúmis hám qola, qızlar altın hám gúmis medalların jeńip alıwǵa miyasar boldı.
Jas sportshılardıń bul tabısı ustazlarına múnásip bayram sawǵası boldı desek aljaspaǵan bolamız.
Jeńimpaz sportshılardı bul jarısqa trenerlerden Dáwirbek Jiyemuratov, Ruslan Sultanov, Sárdar Nazarımbetov, Erbol Jumabaev, Pazılbek Esebaev, Latifa Ótebaeva hám Zarina Kazbekovalar tayarladı.

Adilbay Orazov,
Qaraqalpaqstan xabar agentligi sholıwshısı.