Hámmege belgili “YouTube” AQSh Prezidenti Donald Tramp penen sud procesin toqtatıw ushın 24,5 million dollar tólewge kelisim berdi. Tramptıń akkauntı 2021-jıl 6-yanvar kúni júz bergen Kapitoliy basqınshılıǵınan soń toqtatılǵannan keyin, milliarder platformanı siyasiy tárepdarlıqta ayıplap, dawa arza bergen edi.

Kelisim shártlerine bola, “Google” korporaciyasınıń bas kompaniyası – “Alphabet” 22 million dollardı Aq úy ushın jańa zal qurıwdı qarjılandırıp atırǵan “Trust for the National Mall” qorına ótkeredi. Qalǵan 2,5 million dawaǵa qosılǵan basqa shólkem hám shaxslar, sonıń ishinde, “American Conservative Union”ǵa tólenedi.
“YouTube” usı jılı Tramp penen kelisiwge májbúr bolǵan úshinshi iri platforma. Yanvarda Meta (Facebook) 25 million, fevralda X (Twitter) 10 million dollardan Amerika jetekshisi paydasına ótken.
Házirgi waqıtta Tramptıń barlıq sociallıq tarmaq betleri tiklengen. Analizshilerdiń pikirinshe, bul process Cilikon oypatlıǵı hám Respublikashılar partiyası arasındaǵı qatnasıqta jańa dáwir baslanǵanınan dárek beredi.
“YouTube” da óz gezeginde platformadaǵı kontent qadaǵalawın jumsartıp, aldın sheklengen ayırım akkauntlardı ashatuǵının málim etti. Kompaniya Respublikashılar qadaǵalawındaǵı Kongress komitetine jollaǵan xatında, tiykarınan, bılay dep jazǵan: “YouTube” konservativ tańlawdı qádirleydi hám bul dawıslar puqaralıq qarım-qatnasta áhmiyetli orın iyeleytuǵının tán aladı.

Muslim Ziyo, ÓzA