Sońǵı jıllarda Ózbekstan hám Pakistan arasındaǵı qatnasıqlar óz-ara isenimli, teń hám doslıq tiykarında alıp barılmaqta. Ekonomikalıq, mádeniy-gumanitarlıq tarawlarda óz-ara birge islesiw baylanısları izbe-iz rawajlanıp barmaqta.

Oliy Majlis Nızamshılıq palatasınıń Spikeri Nuriddin Ismoilov basshılıǵındaǵı parlament delegaciyası Pakistan Islam Respublikasınıń paytaxtı Islamabad qalasına bardı. Sapar etiw dawamında Pakistan Islam Respublikası Parlamenti Milliy Assambleyasınıń Spikeri Sardor Ayoz Sodiq penen ushırasıw ótkerildi.
Ushırasıwda Ózbekstan – Pakistan qatnasıqların rawajlandırıw perspektivaları, atap aytqanda, parlamentleraralıq birge islesiwdi keńeytiw máseleleri dodalandı.
Sóylesiwde Ózbekstan hám Pakistan arasındaǵı óz-ara isenimli birge islesiw rawajlanıp atırǵanı atap ótilip, Prezident Shavkat Mirziyoevtiń 2022-jılı Pakistanǵa, usı jılı fevral ayında bolsa Pakistan Islam Respublikası Bas ministri Shahboz Shariftiń mámleketimizge saparı Ózbekstan – Pakistan strategiyalıq sherikliginde jańa bet ashqanı atap ótildi.
Nızamshılıq palatasınıń Spikeri Ózbekstanda Prezident Shavkat Mirziyoevtiń basshılıǵında ekonomikalıq, jámiyetlik-siyasiy tarawlarda ámelge asırılıp atırǵan reformalar hám olardıń nátiyjeleri, Nızamshılıq palatasınıń jumısı, nızam dóretiwshiligi hám parlamentlik qadaǵalaw, parlamentleraralıq birge islesiw tarawında alıp barılıp atırǵan jumıslar haqqında maǵlıwmatlar berdi.
Óz gezeginde, Sardor Ayoz Sodiq Ózbekstan Pakistan ushın isenimli strategiyalıq sherik ekenin atap ótip, mámleketimizde ámelge asırılıp atırǵan keń kólemli reformalardı joqarı bahaladı.
Ózbekstan – Pakistan baylanıslarınıń jedellesip baratırǵanında Prezident Shavkat Mirziyoevtiń siyasiy erk-ıqrarı hám baslamaları áhmiyetli orın iyeleytuǵının atap ótti.
Ushırasıwda Ózbekstan – Pakistan parlamentlik baylanısların bunnan bılay da rawajlandırıw, jańa mazmun menen bayıtıw, nızam dóretiwshiligi tarawında óz-ara tájiriybe almasıw, doslıq toparlarınıń jumısın bunnan bılay da keńeytiw zárúr ekenligi atap ótildi.

Muhtarama Komilova,
ÓzAnıń xabarshısı