Paytaxtımızda qurılǵan milliy mádeniy oraylardıń pavilonında Ózbekstanda Shanxay birge islesiw shólkemi Xalıq diplomatiyası orayı hám Milletleraralıq qatnasıqlar hám sırt eldegi watanlaslar máseleleri boyınsha komiteti baslaması menen jergilikli hám sırt el ǵalaba xabar qurallarınıń 40 tan aslam wákiliniń qatnasıwında press-tur shólkemlestirildi.

Dáslep komitet baslıǵınıń orınbasarı Bekzod Shukurov jurnalistlerge kompleks haqqında tolıq maǵlıwmat berdi. Soń túrli milletlerdiń úrp-ádetinen sóz etetuǵın súwretler, úy-ruwzıgershilik buyımları, kórkem óner shıǵarmaları, saz ásbapları hám basqa da úskenelerden quralǵan 22 millettiń ózine tán arxitekturası sáwlelengen qazaq, qırǵız, túrkmen hám bashqurt otawları, koreys, belarus, ukrain, grek, nemis, dungan, polyak, evrey, gruzin, armyan, tatar hám qırım-tatar, uyǵır, túrk, tájik, qıtay, rus hám ázerbayjan xalıqlarınıń eki qabattan ibarat doslıq úyleri kórsetildi. Hár bir úy menen jaqınnan tanısıw waqtında belgili bir millettiń ózine tán kórkem shıǵıwları usınıldı.

Elimizde jasap atırǵan barlıq millet hám xalıqlar óz mádeniyatı hám úrp-ádetin, dástúrlerin saqlap qalıwı, rawajlandırıwı ushın jáne bir imkaniyatqa aylanǵan bul áywan mámleketimiz basshısınıń baslaması menen qurılǵan bolıp, usı jılı “30-iyul – Xalıqlar doslıǵı kúni” aldınan paydalanıwǵa tapsırıldı.
Hár qıylı mádeniyat hám dástúrlerdi sáwlelendiretuǵın eki qabatlı imaratlar tárizinde qurılǵan bul kompleks endi milletleraralıq tatıwlıq hám ulıwma milliy awızbirshilik baǵdarında ámelge asırılıp atırǵan úlken reformalarımızdı sáwlelendirip, óz-ara mádeniy almasıw maydanı wazıypasın atqarmaqta.

Milliy mádeniy oraylar pavilonı qısqa waqıt ishinde milletleraralıq tatıwlıqtı úgit-násiyatlawshı áhmiyetli ilajlarǵa basshılıq etti. Atap aytqanda, Ózbekstan Respublikası Mámleketlik ǵárezsizliginiń 34 jıllıǵı sheńberinde “Ulıwma milliy tatıwlıq” festivalı, qawın seyili, milliy mádeniy oraylardıń wákilleri qatnasıwında “Zakovat” bellesiwi, Ózbekstan hám Túrkmenstan ǵárezsizliginiń 34 jıllıǵına baǵıshlanǵan “Ózbek-túrkmen qatnasıǵı jańa tariyxıy basqıshta” atamasındaǵı mádeniy-aǵartıwshılıq ilaj solardıń qatarına kiredi.

Ilaj sońında press-tur qatnasıwshıları hám miymanlar milliy mádeniy oraylardıń jumısı, strukturalardıń mádeniy baylanıstı bekkemlewdegi ornı hám áhmiyetine baylanıslı tolıq maǵlıwmatqa iye boldı.

Juwmaqlap aytqanda, milliy mádeniy oraylardıń pavilonı túrli millet wákilleri arasında doslıq, awızbirshilik hám óz-ara isenimdi bekkemlew, sonday-aq, xalıqaralıq doslıq baylanısların rawajlandırıw ushın keń imkaniyat jaratadı.

Ǵolib XONNAZAROV,
ÓzAnıń xabarshısı