«Aymaqlıq elektr tarmaqları» akcionerlik jámiyeti Qaraqalpaqstan aymaqlıq filialında kárxana tárepinen 2025 – jıldıń ótken dáwirinde orınlanǵan jumıslarǵa baǵıshlanǵan baspasóz konferenciyası bolıp ótti.

Onda shıǵıp sóylegenler filial tárepinen 2025-jılǵa belgilengen jumıslardıń orınlanıw barısı haqqında maǵlıwmatlar berdi. Atap ótilgenindey, aymaqlıq filial tárepinen Ѳzbekstan Respublikası Prezidentiniń 2024-jıl 23-sentyabrdegi «Kámbaǵallıqtan abadanlıqqa qaray» baǵdarlamasın ámelge asırıw haqqında»ǵı 330-sanlı qararı tiykarında, 590.7 km elektr uzatıw tarmaqları hám 88 dana transformator punktleri qurılıp, 12 829 dana temir-beton baǵanaları ornatılǵan.
Sonday-aq, Ózbekstan Respublikası Prezidentiniń 2024-jıl 24-dekabr kúngi “2025-2027-jıllarda Ózbekstan Respublikasınıń sociallıq hám óndiris infrastrukturasın rawajlandırıw ilajları haqqında”ǵı PQ-454-sanlı qararı tiykarında 24,9 km 0,4-6/10kV elektr uzatıw tarmaqları hám 1 dana podstanciya jańadan qurılıp, bul jumıslar dawam etpekte.
Usılar menen bir qatarda, Ѳzbekstan Respublikası Prezidentiniń 2021-jıl 9-dekabrdegi «Jańa Ózbekstan» massivlerin qurıw hám aymaqlardıń sociallıq-ekonomikalıq jaqtan rawajlanıwın támiyinlew ilajları haqqında»ǵı pármanı tiykarında Ámiwdárya, Qanlıkól hám Ellikqala rayonlarında 3 máhállede 103 temir-beton baǵanaları, 5,1 km aralıqtaǵı elektr uzatıw tarmaqları hám 3 transformator punktleri qurılıp, bul baǵdardaǵı isler qızǵın dawam etip atır.
Ilajda jurnalistler tárepinen búgingi kúni jámiyetshilikti qızıqtırıp júrgen máseleler boyınsha sorawlar berilip, olarǵa tiyisli juwaplar alındı.

Qaraqalpaqstan xabar agentligi