Belgili mámleketlik hám jámiyetlik ǵayratker, Ózbekstan Respublikası suw xojalıǵı ministriniń keńesgóyi Ismoil Hakimovich Jwrabekov bıyıl 28-sentyabr kúni 94 jasında qaytıs boldı.

I.Jwrabekov 1931-jılı 12-sentyabrde Samarqand qalasında jumısshı shańaraǵında tuwıldı. Orta mektepti tamamlaǵannan soń Tashkent irrigaciya hám awıl xojalıǵın mexanizaciyalaw injenerleri institutında injener-gidrotexnik qánigeligi boyınsha bilim aldı. Miynet jolın 1955-jılı Samarqand wálayatınıń Pastdarǵom rayonındaǵı 8-kolxozda injener-gidrotexnik sıpatında basladı. Keyin ala usı rayonda Suwǵarıw orayınıń baslıǵı, Ózbekstan suw xojalıǵı ministrligi janındaǵı Samarqand wálayatı qurılıs-montajlaw basqarmasınıń baslıǵı, “Suwqurılıs” trestiniń basqarıwshısı, suw xojalıǵı ministriniń birinshi orınbasarı, melioraciya hám suw xojalıǵı ministri sıyaqlı juwapker lawazımlarda nátiyjeli miynet etip, respublikamızda irrigaciya hám melioraciya tarawın rawajlandırıwǵa múnásip úles qostı.
Shólkemlestiriw-xojalıq jumıslarına basshılıq etiw baǵdarında úlken bilim hám tájiriybege iye bolǵan I.Jwrabekov 1985-jılı jáne de juwapkershilikli wazıypa – Ózbekstan Ministrler Keńesi baslıǵınıń birinshi orınbasarı etip tayınlandı.
Watanımız ǵárezsizlikke eriskennen keyin Ózbekstan Respublikası Bas ministriniń birinshi orınbasarı sıpatında mámleketimiz ǵárezsizliginiń sociallıq-ekonomikalıq tiykarların bekkemlew, elimiz aldında turǵan oǵada kóp qırlı hám keń kólemli wazıypalardı orınlaw jolında jankúyerlik kórsetti. Atap aytqanda, atqarıw hákimiyatı institutlarınıń jumısın nátiyjeli jolǵa qoyıw, jergilikli hákimliklerdiń jumısın muwapıqlastırıw, awıl xojalıǵında reformalardı ámelge asırıw, fermerlik háreketin rawajlandırıw, tarawdıń materiallıq-texnikalıq bazasın hám kadrlar potencialın bekkemlew baǵdarında shólkemlestiriwshilik hám intakerlik pazıyletlerin kórsetti.
I.Jwrabekov Mámleketlik suw qadaǵalawınıń baslıǵı, Ózbekstan Respublikası Prezidentiniń Mámleketlik keńesgóyi lawazımlarında da nátiyjeli jumıs alıp bardı.
Jańa Ózbekstandı qurıwǵa qaratılǵan keń kólemli reformalarımızdı ámelge asırıwda I.Jwrabekov, úlken jasta bolıwına qaramastan, suw xojalıǵı ministriniń keńesgóyi sıpatında xızmet etip, óziniń bay bilim hám tájiriybesi, bahalı másláhátleri menen tarawdı rawajlandırıw, jas kadrlardı tárbiyalaw jumıslarında belsene qatnastı.
I.Jwrabekovtıń xalqımız hám Watanımız aldındaǵı xızmetleri mámleketimiz tárepinen múnásip sıylıqlandı. Ol “Ózbekstan Respublikasına xızmet kórsetken irrigator” húrmetli ataǵı, “Mehnat shuhrati,” “Dwstlik,” “Fidokorona xizmatlari uchun,” “El-yurt hurmati,” “Buyuk xizmatlari uchun” ordenleri menen sıylıqlandı.
Belgili mámleketlik hám jámiyetlik ǵayratker, haq kewil hám kishipeyil insan, jaslardıń mehriyban ustazı Ismoil Jwrabekovtıń esteligi kewillerimizde máńgi saqlanıp qaladı.

Sh.Mirziyoev, T.Norboeva,
N.Ismoilov, A.Aripov