“The Lancet” – jetekshi ekspertler, húkimetler hám xalıqaralıq shólkemlerdiń itibarındaǵı basılım. Onıń betlerinde maqala basıp shıǵarılıwı temanıń tek ǵana joqarı ilimiy qunı emes, al dúnya kún tártibi ushın áhmiyetli ekenligin ańlatadı.

Maqalada, áyne, Ózbekstan balalar arasındaǵı onkologiyalıq keselliklerge qarsı gúresiw, zamanagóy medicinanı rawajlandırıw hám xalıqaralıq birge islesiwdi bekkemlew baǵdarında sistemalı islep atırǵan mámleket sıpatında basqa mámleketlerge úlgi etip kórsetilgeni ayrıqsha áhmiyetke iye.
Atap aytqanda, Prezident Shavkat Mirziyoevtiń pármanına muwapıq Balalar rak keselligine qarsı gúresiw milliy strategiyası qabıl etilgeni, Tashkent qalasında Balalar ragi boyınsha xalıqaralıq akademiyalıq xab shólkemlestirilip atırǵanı atap ótilgen.
Usı tárizde, “The Lancet” jurnalında basıp shıǵarılǵan maqala Ózbekstannıń jedel rawajlanıp atırǵan, ashıq-aydın hám juwapkershilikli mámleket sıpatında abırayı artıp atırǵanın hám global mashqalalardı sheshiwge salmaqlı úles qosıwǵa qádir ekenligin tastıyıqlaydı.

Qaraqalpaqstan xabar agentligi