Búgingi kúnde málimleme texnologiyaları mámlekettiń ekonomikasın joqarılatıw, jańa jumıs orınların jaratıw, investiciya ortalıǵın jetilistiriwde áhmiyetli faktorǵa aylanbaqta.

Bunday global processlerden shette qalmawı ushın Ózbekstan  da sanlı texnologiyalar tarawın jedellik penen rawajlandırıw jolında izbe-iz háreket etpekte.

Sol kózqarastan, “ICT Week Uzbekistan – 2025” sheńberinde ótken AT Investiciya forumı tek tarawdıń búgingi jaǵdayı emes, al onıń keleshegi haqqında da oylaw hám pikir almasıw ushın áhmiyetli minber boldı.

Ilaj húkimet basshıları, xalıqaralıq investorlar, finanslıq institutlar hám texnologiya tarawındaǵı jetekshilerdi bir maydanǵa jıynap, Ózbekstanda AT investiciyalarınıń perspektivaları hám jańa  imkaniyatların dodalaw ushın áhmiyetli platforma bolıp xızmet etti.

Ánjumanda  Ózbekstan AT tarawında bar investiciya  imkaniyatları usınıs etildi. Mámlekette innovaciyalıq startaplar, IT Park rezidentleri, programmalıq támiynat islep shıǵarıwshıları hám texnologiyalıq joybarlarǵa investiciya kirgiziwdiń abzallıqları ayrıqsha atap ótildi.

Sonday-aq, mámleket tárepinen tarawǵa berilip atırǵan jeńillikler, qollap-quwatlaw mexanizmleri hám Ózbekstannıń sanlı xızmetler eksportın keńeytiw arqalı regionallıq IT–xab sıpatında  qáliplesip atırǵan perspektivaları dodalandı.

Sonıń menen birge, xalıqaralıq imkaniyatlar, finanslıq institutlar hám jergilikli isbilermenler arasında birge islesiw qatnasıqların keńeytiw máselesi de áhmiyetli  tema boldı. Qatnasıwshılar birgeliktegi kárxanalar shólkemlestiriw, transmilliy kompaniyalar menen sheriklikti rawajlandırıw hám xalıqaralıq finanslıq institutlar  menen jańa baǵdarlamanı  ámelge asırıw jolların kórip shıqtı.

Forumda turaqlı sanlı infrastruktura hám “jasıl” texnologiyalardı rawajlandırıw zárúrligi da atap ótildi. Ekologiyalıq qáwipsiz maǵlıwmatlar orayları qurıw, qayta  tikleniwshi energiya dereklerinen paydalanıw, energiya nátiyjeliligi joqarı bolǵan infrastruktura sheshimlerin engiziw máseleleri boyınsha pikir almasıldı.

Jáne bir  tiykarǵı  baǵdar sıpatında innovaciya hám birge islesiw arqalı jańa bazarlardı ashıw máselesi dodalandı. Jergilikli startap  ekosistemasınıń imkaniyatları, innovaciyalıq ónim hám xızmetlerdi sırt  elli bazarǵa  alıp shıǵıw mexanizmleri, birgeliktegi joybarlardı ámelge  asırıw hám sanlı ekonomikanıń jańa segmentlerin rawajlandırıwǵa ayrıqsha  itibar qaratıldı.

Nigora RAHMONOVA, ÓzA