Ámiwdárya rayonında «Úsh áwlad ushırasıwı» bolıp ótti. Onda respublika hám rayon basshılar, pidayı miynet veteranları, aymaqtıń rawajlanıwına salmaqlı úles qosqan tájiriybeli insanlar hám jaslar qatnastı.

Dáslep rayon jasları ushırasıwǵa kelgen miymanlardı saltanatlı túrde kútip alıp, aymaq ónermentleriniń biytákirar qol miyneti buyımları, isbilermenlerdiń islep shıǵarǵan hár qıylı ónimleriniń kórgizbesi menen tanıstırdı.
Ilajdıń ashılıw saltanatında Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov shıǵıp sóylep, úsh áwlad ushırasıwınıń jámiyetlik-ruwxıy turmısımızdaǵı ornı, ásirese, jaslardı tárbiyalawdaǵı áhmiyetine ayrıqsha toqtap ótti.
Ilaj dawamında túrli tarawlarda pidákerlik penen miynet etip atırǵan pidayı insanlar, elimizdiń rawajlanıwına úles qosıp kiyatırǵan nuraniyler, zamanagóy bilimge iye ziyrek hám belsendi jaslar sıylıqlandı.
Onda respublikamızǵa belgili mádeniyat hám kórkem óner wákilleri tárepinen tayarlanǵan koncert baǵdarlaması ilaj qatnasıwshıları názerine usınılıp, bul keshege ózgeshe zawıq baǵıshladı.

Qaraqalpaqstan xabar agentligi