Berdaq atındaǵı Qaraqalpaq mámleketlik universitetinde áhmiyetli ushırasıw bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Prezident Administraciyası baslıǵınıń sud sistemasın reformalaw boyınsha orınbasarı Nodira Hakimova hám Ózbekstan Respublikası Sudyalar joqarı keńesiniń sudyası Malikaxon Qalandarovalar qatnastı.

Dáslep miymanlar universitette bilimlendiriw processleri hám jaratılǵan sharayatlar menen tanıstı. Bunnan soń Yuridika fakulteti student-jasları menen ushırasıp, sáwbetlesti. Ushırasıwda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, elimiz keleshegin qurıwda jaslardıń tutqan ornın hám juwapkershiligin ayrıqsha atap ótti. Sáwbetlesiw dawamında mámleketimizde sud-huqıq tarawında ámelge asırılıp atırǵan reformalardıń baǵdarı, olardıń jámiyetimiz turmısındaǵı áhmiyeti hám jaslar ushın jaratılıp atırǵan keń imkaniyatlar haqqında aytıp ótti.
Sáwbetlesiw barısında studentler xalıqtıń huqıqıy sanasın hám mádeniyatın arttırıwǵa, jaslardıń huqıqıy tarawda belsene qatnasıwın qollap-quwatlawǵa baylanıslı óz pikirlerin bildirdi. Bul ushırasıw studentlerde huqıqıy bilim hám kónlikpelerdi bekkemlewde, sonday-aq, olardı sud-huqıq sistemasında alıp barılıp atırǵan keń kólemli reformalardıń barısı menen jaqınnan tanıstırıwda ayrıqsha áhmiyetke iye boldı.

Qaraqalpaqstan xabar agentligi