Moskva qalasında bolıp ótip atırǵan Jáhán atom hápteligi sheńberinde Ózbekstan hám Rossiya mámleketleri arasında eki strategiyalıq kelisimge qol qoyıw máresimi ótkerildi.

“Ózatom” agentligi direktorı Azim Ahmedxwjaevtıń atap ótiwinshe, bul kelisim “Rosatom energetika joybarları” AJ hám “AES qurılısı direkciyası” DK arasındaǵı 2025-jıl 20-iyundaǵı kelisimge Ózbekstan Respublikasında integraciyalasqan atom elektr stanciyasın qurıw joybarın ámelge asırıwdıń tiykarǵı shártleri haqqındaǵı qosımsha hújjet bolıp esaplanadı.
Ol 3+ áwladtaǵı 2 “VVER-1000” reaktorı hám 2 “RITM-200N” reaktorı tiykarında kishi hám úlken quwatlılıqtaǵı atom stanciyalarınan ibarat integraciyalasqan AES qurılısı joybarınıń konfiguraciyasın belgilewdi názerde tutadı.
Ekinshi hújjet bolsa “Rosatom energetika joybarları” AJ hám “AES qurılısı direkciyası” DK arasında Ózbekstan Respublikasında kishi quwatlılıqtaǵı atom elektr stanciyası hám úlken quwatlılıqtaǵı atom elektr stanciyası ushın yadro janılǵısın jetkerip beriw boyınsha shártnamalardıń tiykarǵı shártleri haqqındaǵı kelisim bolıp tabıladı.
Kelisim qol qoyıwshılar arasında “RITM-200N” hám “VVER-1000” reaktor qurılmaları ushın yadro janılǵısı, sonday-aq, awısıq bóleklerdi jetkerip beriw boyınsha tiykarǵı kelisimlerdi bekkemleydi.
Ilaj juwmaǵında “Ózatom” agentliginiń direktorı Azim Ahmedxwjaev ǴXQ wákillerine intervyu berip, Jizzaq wálayatında misli kórilmegen energetika joybarınıń engiziletuǵının atap ótti.
– Oraylıq Aziyada atom energetikasın rawajlandırıwda jetekshi sıpatında tek ǵana regionda birinshi stanciyanı qurmaymız, al birinshi bolıp keleshektiń innovaciyalıq sheshimin jaratamız. Biziń joybarımız kishi modulli stanciyalardıń aldınǵı texnologiyaları hám úlken quwatlılıqtaǵı klassikalıq atom energetikasınıń waqıt sınaǵınan ótken sheshimleriniń kombinaciyası bolıp esaplanadı, – dedi A.Ahmedxwjaev.

Nasiba Ziyodullaeva,
Muqimjon Qodirov (súwret),
ÓzA