Mayıplıǵı bolǵan shaxslar jámiyetimizdiń bir bólegi hám teń huqıqlı aǵzası bolıp esaplanadı. Mayıplıǵı bolǵan shaxslardıń huqıqların kepillikke alıw maqsetinde tarawda bir qatar reformalar ámelge asırılmaqta.

Endi mayıplıqtı belgilewde shıpakerlik másláhát komissiyalarınıń ornına 18,5 mıń shańaraqlıq shıpakerler nawqastıń medicinalıq hújjetlerin úyrenip, ekspert komissiyasına ózi jiberedi. Bul arqalı waqıt hám gezekler biraz qısqaradı.
Ádette, shipakerlik másláhát komissiyaları tárepinen bir nawqastıń hújjetin úyreniw ushın 40-45 minut waqıt talap etilgen. Endi nawqas keselligi haqqında avtomat túrde qáliplesetuǵın maǵlıwmatlar 6 dan 33 ke kóbeyip, maǵlıwmatlardı toltırıwǵa ketetuǵın waqıt 2 saattan 20-25 minutqa shekem qısqardı.
Aldınları nawqas kesellikke baylanıslı bolmaǵan kóplegen tekseriwlerden ótiwi kerek edi. Oǵan mısal, ayaq amputaciyasına ushıraǵan nawqas bioximiyalıq tekseriwler, qan hám sidik ulıwma analizi, EKG, rentgen, terapevt, nevrolog, xirurg hám travmatolog juwmaǵı talap etilgen. Bul bolsa nawqas ushın ortasha 400-500 mıń sum átirapındaǵı qárejet degeni edi. Nawqaslardı tekseriwlerden ótkeriw normaları islep shıǵılıp, endi, nawqas tek ǵana standartta kórsetilgen tekseriwden biypul ótedi.

Dildora DWSMATOVA,
ÓzAnıń xabarshısı