Salıq esabatı salıq tólewshiniń hár bir salıq túri yamasa tólengen dáramatlar boyınsha esap-sanaqlardı hám salıq deklaraciyaların, sonday-aq esap-sanaqlarǵa hám salıq deklaraciyalarına qosımshalardı óz ishine alǵan, salıq tólewshilerdiń hám salıq agentleriniń salıq minnetlemelerin anıqlaw ushın tiykar bolıp xızmet etetuǵın hújjetleri bolıp tabıladı.

Salıq esabatı Ózbekstan Respublikası Mámleketlik salıq komiteti tárepinen Ózbekstan Respublikası Qarjı ministrligi menen kelisilgen halda tastıyıqlanatuǵın formalarda dúziledi. Salıq esabatı salıq uyımlarına tek ǵana shaxs salıq tólewshi dep tán alınatuǵın salıqlar boyınsha usınıladı.
Ózbekstan Respublikası Hákimshilik juwapkershilik haqqındaǵı kodeksiniń 175-statyası 2-bólimine tiykarlanıp, salıq esabatı óz waqtında usınılmaǵanı ushın kárxananıń lawazımlı shaxslarına bazalıq esaplaw muǵdarınıń 10 esesi muǵdarında hákimshilik járiyma názerde tutılǵan.
Hákimshilik jaza huqıqbuzarlıq islengen kúnnen baslap 1 jıldan keshiktirmey, dawam etip atırǵan huqıqbuzarlıqlar ushın bolsa, huqıqbuzarlıq anıqlanǵan kúnnen baslap 1 jıldan keshiktirmey qollanılıwı múmkin.
Máselen, 2024-jıl oktyabr ayı ushın qosımsha qun salıǵı boyınsha salıq esabatın tapsırıwdıń sońǵı múddeti Salıq kodeksiniń 273-statyası 1-bólimine tiykarlanıp, 2024-jıl 20-noyabr esaplanadı. Yaǵnıy, 2024-jıl 21-noyabr huqıqbuzarlıq júz bergen kún esaplanadı hám usı sáneden baslap 1 jıl dawamında huqıqbuzarǵa hákimshilik járiyma qollanılıwı múmkin.
Sonday-aq, Ózbekstan Respublikası Salıq kodeksinde belgilengen barlıq salıqlar hám jıyımlar ushın usı Kodekstiń arnawlı bóliminde salıqlar hám jıyımlardı esaplap shıǵıw, salıq esabatın usınıw salıqlardı tólew tártibi hám múddetleri kórsetilgen.
Atap aytqanda, 2024-jıldıń 7-oktyabr sánesi – sentyabr ayı ushın bankler tárepinen Ózbekstan Respublikasınıń rezidentleri bolmaǵan kárxanalar ushın ámelge asırılǵan tólemler (dividendler hám procentler tóleminen tısqarı) boyınsha yuridikalıq táreplerden alınatuǵın payda salıǵın byudjetke ótkeriwdiń aqırǵı kúni, 9-oktyabr – alkogol ónimlerin realizaciyalaw huqıqı ushın jıyım tólewdiń aqırǵı kúni, 10-oktyabr – akciz salıǵı esabın usınıw hám tólewdiń aqırǵı kúni hám oktyabr ayı ushın aylanıstan salıq tólewshiler esaplanbaytuǵın salıq tólewshiler tárepinen múlk salıǵınıń jıllıq summasınıń on ekiden bir bólegi muǵdarında aǵımdaǵı tólemlerdi tólewdiń aqırǵı kúni, 15-oktyabr – esaplanǵan hám ámelde tólengen dáramatlar summaları hám de fizikalıq shaxslardan alınatuǵın dáramat salıǵınıń uslap qalınǵan summaları haqqındaǵı maǵlıwmatlardı usınıw, sonday-aq sociallıq salıq esabın usınıw hám tólewdiń aqırǵı kúni, 23-oktyabr – jámi dáramatı aǵımdaǵı salıq dáwirinen aldınǵı salıq dáwiri ushın kirgizilgen dúzetiwler esapqa alınǵan halda 10 mlrd sumnan artatuǵın payda salıǵı tólewshileri hár aylıq avans tólemlerin tólewdiń aqırǵı kúni bolıp esaplanadı.
Bunnan tısqarı, Salıq kodeksiniń ulıwma bóliminiń talaplarına tiykarlanıp, salıq esabatların belgilengen múddetlerde usınıw salıqlardı tólew minnetlemesine iye barlıq salıq tólewshiler ushın májbúriy bolıp esaplanadı.

D. Kalmuratov,

Ózbekstan Respublikası Bas prokuraturası janındaǵı

Ekonomikalıq jınayatlarǵa qarsı gúresiw departamenti
aǵa revizorı.
Qaraqalpaqstan xabar agentligi