Búgin, 26-sentyabr – Ózbekstan Respublikası Mámleketlik qáwipsizlik xızmeti uyımları xızmetkerleri kúni.

Qáwipsizlikti támiyinlew, dúnyada bolıp atırǵan qıyın hám qáwipli jaǵdayda tınıshlıqtı saqlaw, xalqımızdıń erkin hám abadan turmısın támiyinlewde qorǵanıw, huqıq qorǵaw uyımları menen bir qatarda Mámleketlik qáwipsizlik xızmeti (MQX) xızmetkerleriniń ayrıqsha ornı bar.

Kóbinese olar kózge ayqın kórinbeydi. Biraq eń qıyın jaǵdaylarda, sheshiwshi máwritlerde olar bar. Kimdur bul elge ǵárezli niyet penen qarasa, tınıshlıqqa zıyan keltirmekshi bolsa, olar birinshilerden bolıp onı sezedi hám oǵan shek qoyadı. Kerek bolsa kókiregin qalqan qıladı.
Búgin olardıń kásiplik bayramı. 2021-jıl 14-sentyabrdegi “Ózbekstan Respublikası mámleketlik qáwipsizlik xızmeti uyımları xızmetkerleri kúnin belgilew haqqında”ǵı nızam menen 26-sentyabr – Ózbekstan Respublikası Mámleketlik qáwipsizlik xızmeti uyımları xızmetkerleri kúni, etip belgilendi.
“Ózbekstan Respublikası Mámleketlik qáwipsizlik xızmeti haqqında”ǵı nızamǵa bola, MQXnıń tiykarǵı wazıypaları – Ózbekstan Respublikasınıń konstituciyalıq dúzimin, suverenitetin, aymaqlıq pútinligin hám basqa da mámleketlik máplerdi sırtqı hám ishki qáwiplerden qorǵawdan, nızamlılıqtı bekkemlew hám nızam ústinligin támiyinlewden, sonday-aq, Mámleketlik qáwipsizlik xızmetiniń wákilligine kirgizilgen huqıqbuzarlıqlardıń aldın alıw, olardı anıqlaw hám olarǵa shek qoyıwdan ibarat.
MQX – mámleket qáwipsizligin támiyinlew maqsetinde óz jumısın arnawlı qurallar, formalar hám usıllar menen ámelge asıratuǵın arnawlı wákillikli mámleketlik uyım.
MQX mámleket qáwipsizligin támiyinlew tarawında birden-bir mámleketlik siyasattı ámelge asıradı. Óz wákillikleri sheńberinde Ózbekstan Respublikasınıń mámleketlik qáwipsizligin hám mámleket mápleriniń sırtqı jáne ishki qáwip-qáterlerden qorǵalıwın támiyinleydi. Bul tarawda nızamshılıq hám nızam ústinligin bekkemleydi.
Házirgi waqıtta taraw xızmetkerleri huqıqbuzarlıqlardıń aldın alıw, olardı anıqlaw hám olardı saplastırıw boyınsha jumıs alıp barmaqta. Ózbekstan Respublikasınıń konstituciyalıq dúzimi, suvereniteti hám aymaqlıq pútinligine qáwiplerdiń aldın alıw, olardı anıqlaw hám saplastırıw boyınsha razvedka hám kontrrazvedka jumısın ámelge asırmaqta.
Ózbekstan Respublikasınıń Mámleketlik shegarasın qorǵaw hám saqlaw, Ózbekstan Respublikasınıń Qurallı Kúshleri hám qorǵanıw-sanaat kompleksin mámleket qáwipsizligine bolatuǵın qáwip-qáterlerden qorǵaw, mámlekettiń qorǵanıw qábiletin bekkemlew boyınsha strategiyalıq baslamalardı ámelge asırıwda qatnaspaqta.
Terrorizm, ekstremizm, shólkemlesken jınayatshılıqqa, qural-jaraq, náshebentlik quralları hám psixotrop zatlardıń nızamsız aylanısına qarsı gúresiw, mámleket mápleri hám qáwipsizligine qáwip tuwdıratuǵın milliy, etnikalıq hám diniy qarama-qarsılıqtı úgit-násiyatlawǵa qaratılǵan buzǵınshılıq jumısınıń aldın alıw, onı anıqlaw hám oǵan shek qoyıw boyınsha izbe-iz jumıs alıp barmaqta.
Ekonomikalıq, ilimiy-texnikalıq, sociallıq hám málimleme tarawlarında mámleketlik qáwipsizlikti támiyinlew, Ózbekstan Respublikası xalqınıń mádeniy-tariyxıy hám bay ruwxıy miyrasın qorǵaw, mámleketlik uyımlar hám basqa da shólkemlerde mámleket máplerine jáne qáwipsizligine qáwip tuwdıratuǵın korrupciya jaǵdaylarına qarsı gúresiw, telekommunikaciyalar hám transport tarawında mámleket qáwipsizlikti támiyinlew, ayrıqsha jaǵdaylarǵa sharayat jaratıwshı faktorlardıń aldın alıw, olardı anıqlaw hám olarǵa shek qoyıw sıyaqlı baǵdarlarda qatnaspaqta.
MQX óz jumısında nızamlılıq, puqaralardıń huqıqları, erkinlikleri hám nızamlı máplerine ámel etiw jáne olardı húrmet etiw, puqaralardıń járdemine súyeniw, huqıqbuzarlıqlardıń aldın alıw hám profilaktikasınıń ústinligi, birden-birlik, ǵárezsizlik, konspiraciya sıyaqlı principlerge ámel etedi.
Nızamǵa muwapıq MQXnıń áskeriy xızmetkerleri óz jumısın puqaralardıń huqıqları, erkinlikleri hám nızamlı máplerine ámel etiw jáne olardı húrmet etiw tiykarında ámelge asıradı.
Usı kúnlerde MQX xızmetkerleri ámelge asırıp atırǵan jumıslarǵa bir názer taslasaq: jaqında MQX hám IIM xızmetkerleri tárepinen alıp barılǵan operativ-izlew ilajları dawamında insan organları hám toqımaları sawdası menen shuǵıllanǵan shólkemlesken jınayıy topar áshkar etildi. Jámlesken jınayıy topardıń 2023-2025-jıllardaǵı jumısı dawamında 32 nawqasqa bóteke yamasa bawır toqımaları kóshirip ótkerilgen. Jámlesken jınayıy topar aǵzalarına jınayat isi qozǵatılıp, tergew háreketleri alıp barıldı. Házirde jınayat sud uyımlarına jiberilgen.
Surxandárya wálayatı Sarıosiyo rayonındaǵı mákan puqaralar jıyınlarınan birindegi hákim járdemshisi óziniń xızmet dárejesinen paydalanǵan halda puqaradan jer maydanın 30 jıl múddetke ijaraǵa alıp beriw esesine 29 million sum talap etken.
MQX, Ekonomikalıq jınayatlarǵa qarsı gúresiw departamenti hám Ishki isler uyımları xızmetkerleri menen birgelikte ótkerilgen operativ ilajda hákim járdemshisi soralǵan puldı alǵan waqıtta ayǵaqlı dáliller menen uslandı. Operativ ilaj dawam ettirilip, injener hám sektor baslıǵı bul pul qarjısın alǵan waqıtta olardıń nızamsız háreketlerine shek qoyıldı.
Házirgi waqıtta bul shaxslarǵa Jınayat kodeksiniń 168 hám 211-statyaları menen jınayat isi qozǵatılıp, tergew háreketleri alıp barılmaqta.
Tájikstannan alıp kelingen 66 kg narkotikalıq zatlar toqtatıp qalındı. “Ravot” shegara bajıxana postında avtomashina tereńnen kózden ótkerilgende, onıń júkxanasına ornatılǵan gaz ballonı ishine 53 oramda náshebentlik quralları jasırılǵanlıǵı málim boldı. Ekspertiza juwmaǵına bola, bul oramlarda 50 kg. 852 gr. “opiy” hám 6 kg. 927 gr. “gashish” dárilik zatları bar ekenligi anıqlandı.
Bunday mısallardı jáne de dawam ettiriw múmkin. Olardıń tiykarında insan huqıqların qorǵaw, xalqımızdıń mápleri, mámleketimizdiń qáwipsizligi jatır.
Juwmaqlap aytqanda, MQX xızmetkerleri xalqımızdıń máplerine qayshı keletuǵın hár qanday jaǵdayǵa shek qoyıw, tınıshlıqqa qáwip salıwı múmkin bolǵan qáwip-qáterlerge qarsı turıwda pidayılıq kórsetpekte.
Mine, usınday pidayılardı kásiplik bayramı menen qutlıqlaymız. Qıyın, biraq maqtanıshlı mashaqatlı jumısında áwmet yar bolıwın tileymiz.

Norgul Abduraimova, ÓzA