Ájiniyaz atındaǵı Nókis mámleketlik pedagogikalıq institutında 2025-2026-oqıw jılı ushın qabıllaw procesiniń juwmaqları hám jańa oqıw jılında ámelge asırılatuǵın jumıslarǵa arnalǵan baspasóz konferenciyası bolıp ótti.

Onda jańa oqıw jılına qabıllaw procesiniń juwmaqları, mámleketlik baǵdarlamalarda mákemege berilgen tapsırmalar, ilimiy-pedagogikalıq, innovaciyalıq jáne oqıw-tárbiyalıq baǵdarda ámelge asırılǵan ilajlar, aldaǵı rejeler tuwralı keń túrde maǵlıwmat berildi.
– 2025-2026-oqıw jılı ushın institutta ulıwma 26 kúndizgi bakalavriat tálim baǵdarı ushın 1 mıń 660, 13 keshki bakalavriat tálim baǵdarı ushın 360, sonday-aq, 24 magistratura qánigeligi ushın 171 orın ajıratıldı, – deydi institut rektorı Alisher Ubbiev. – Búgingi kúnde institutta bakalavriattıń kúndizgi, sırtqı, keshki hám aralıqtan oqıtıw formalarında ulıwma 13 mıńǵa shamalas student, magistratura qánigeliklerinde 400 den aslam magistrant oqıp atır.
Institutta 2025-jılda jumıs islep atırǵan professor-oqıtıwshılardıń sanı 560 tan aslam bolıp, jańa oqıw jılında ilimiy-innovaciyalıq baǵdardaǵı jumıslardı jetilistiriwge ayrıqsha dıqqat qaratılmaqta. Jıl juwmaǵına shekem ilimiy dárejelilik kórsetkishin 43,5 procentten 50 procentke jetkeriw, professor-oqıtıwshılardıń qánigeligin jetilistirip barıw, xalıqaralıq birge islesiwdiń nátiyjeliligin bunnan bılay da arttırıw, ilimiy-innovaciyalıq jumıslardı xalıqaralıq grantlar hám fondlar esabınan qarjılandırıw ushın anıq maqsetler belgilengen. Búgingi kúnde institutımızdı elimizdegi eń abıraylı JOOlardan birine aylandırıw, xalıqaralıq reytinglerge alıp kiriw baǵdarında jámáátimiz benen bir qatar wazıypalardı belgilep alǵanbız.
Ózbekstan Respublikası Prezidentiniń bilimlendiriw tarawında izbe-izlik hám úzliksizlikti támiyinlew, ilim hám ámeliyattıń úylesimliligin kúsheytiw, sonday-aq, xalıqaralıq tájiriybe tiykarında oqıw baǵdarlamaların modernizaciyalaw maqsetinde qabıl etilgen «Pedagog kadrlardı tayarlaw sistemasın bunnan bılay da jetilistiriw ilajları haqqında»ǵı pármanı tiykarında respublikadaǵı 13 pedagogikalıq joqarı oqıw ornı, sonıń ishinde, Ájiniyaz atındaǵı Nókis mámleketlik pedagogikalıq institutı da Mektepke shekemgi hám mektep bilimlendiriwi sistemasına ótkerildi.
Usı sebep penen shólkemlestirilgen instituttıń jańa strukturasına bola, fakultetler hám kafedralar optimallastırılıp, 7 fakultet hám olardıń quramındaǵı 26 kafedra qayta shólkemlestirildi. Sonday-aq, xalıqaralıq birge islesiw boyınsha prorektor lawazımın engiziw boyınsha jumıslar alıp barılmaqta. Pármanǵa muwapıq, institutta oqıw reje hám oqıw baǵdarlamaları Milliy qánigelik ramkası, bilimlendiriwdiń xalıqaralıq standart klassifikatorı (MSKO-2011) hám xalıqaralıq bahalaw baǵdarlamaları (PISA, TIMSS, PIRLS, TALIS) talapları tiykarında islep shıǵılıp, 2 hám 3-kurs bakalavr tálim baǵdarları jáne magistratura qánigelikleriniń oqıw reje hám baǵdarlamaları «TOP-300»lik reytingindegi sırt el joqarı oqıw orınlarınıń rejelerine sáykes etip islep shıǵıldı. Olar arasında L.N.Gumilyov atındaǵı Evraziya milliy universiteti, Rossiya Federaciyasınıń Lomonosov atındaǵı Moskva mámleketlik universiteti, Túrkiyanıń Jaqın Shıǵıs texnika universiteti jáne Avstraliyanıń Sidney universiteti bar.
Sonday-aq, ilaj dawamında studentlerdiń ámeliyat procesi, pitkeriwshilerdi jumıs penen támiyinlew boyınsha alıp barılǵan jumıslar haqqında da maǵlıwmat berildi.
Mámleketimiz basshısı óndiris hám ilim arasındaǵı integraciyanı rawajlandırıw máselesine turaqlı túrde itibar qaratadı. Usı maqsette institutta biologiya, ximiya hám fizika tálim baǵdarları boyınsha oqıw laboratoriyaları, texnologiyalıq tálim baǵdarı boyınsha oqıw-ustaxanaları jumıs alıp barmaqta.
Baspasóz konferenciyasında ǵalaba xabar quralları wákilleri ózlerin qızıqtırǵan sorawlarǵa instituttıń juwapker xızmetkerlerinen juwap aldı. Sonday-aq, jańa oqıw jılı dawamında ámelge asırılatuǵın jumıslardı keń jámiyetshilikke óz waqtında jetkerip beriw baǵdarında birge islesiwdi ele de jetilistiriw boyınsha pikir-usınısların bildirdi.

Qaraqalpaqstan xabar agentligi