Tashkent qalasında «Ózbekstanda maǵlıwmatlar basqarıwı (data governance)n tallaw hám rawajlandırıw» temasında seminar shólkemlestirildi.

Mámleketlik uyımlar, jeke menshik sektor, puqaralıq jámiyet institutları, joqarı bilimlendiriw mákemeleri hám xalıqaralıq shólkemlerdiń wákilleri qatnasqan seminarda mámlekette maǵlıwmatlar basqarıwı sistemasın rawajlandırıw, aǵımdaǵı mashqalalar hám imkaniyatlar keńnen dodalandı.
Ádillik ministriniń orınbasarı Nwmon Muhammadiev, Evropa Awqamınıń Ózbekstandaǵı elshisi Toyvo Klaar, BMSh Rawajlanıw baǵdarlamasınıń Ózbekstandaǵı turaqlı wákiliniń orınbasarı Anas Karman qutlıqlaw sózleri menen qatnasıwshılardı qutlıqladı.
Seminarda BMSh Rawajlanıw baǵdarlamasınıń data governance metodologiyası tiykarında maǵlıwmatlardı basqarıw principleri, nızamshılıqtaǵı boslıqlar, mámleketlik uyımlar hám jeke menshik sektordıń roli, maǵlıwmatlar almasıwı hám texnologiyalıq infrastrukturanı rawajlandırıw máseleleri boyınsha prezentaciya hám dodalawlar ótkerildi.
Sessiyalar dawamında qatnasıwshlılar maǵlıwmatlardıń sapasın hám qáwipsizligin támiyinlew, olardı qorǵaw, mámleketlik xızmetlerdi jáne de jetilistiriw hám ashıq-aydınlıqtı kúsheytiwge qaratılǵan ámeliy usınıslar islep shıqtı.
Seminardıń juwmaǵında Ózbekstan Respublikasında milliy maǵlıwmatlar basqarıwı sistemasın jetilistiriw, mámleketlik basqarıwda ashıq-aydınlıqtı arttırıw hám sanlı reformalardı jedellestiriw boyınsha usınıslar islep shıǵıldı.
Seminar Ózbekstanda turaqlı rawajlanıwǵa xızmet etetuǵın zamanagóy maǵlıwmatlar ekosistemasın jaratıwda áhmiyetli qádem bolıp xızmet etedi.

N.Abduraimova,
ÓzA