Vena qalasında «Jas hayal-qızlar tınıshlıq ushın: Oraylıq Aziya hayal-qızlarınıń imkaniyatların keńeytiw» baslamasınıń (YW4P) juwmaqlawshı sessiyası bolıp ótti.

Onda Evropa Awqamı, Evropada Qáwipsizlik hám birge islesiw shólkemi (EQBSh) delegaciyaları hám Oraylıq Aziya mámleketleri parlamentleriniń aǵzaları qatarında Oliy Majlis Senatınıń Jaslar, hayal-qızlar, mádeniyat hám sport máseleleri komiteti baslıǵı Orzigul Qozixonova da qatnastı.
Ilajda hayal-qızlardıń erkin qarar qabıl etiw kónlikpelerin rawajlandırıw, ekologiyalıq turaqlılıqtı támiyinlew hám jámiyette hayal-qızlardıń roli haqqında bayanatlar tıńlandı. Qatnasıwshılar YW4P baslamanıń áhmiyetli baǵdarları hám nátiyjelerin hár tárepleme dodaladı.
Mámleketlik hám xalıqaralıq shólkemler tárepinen hayal-qızlardı qollap-quwatlaw, huqıqıy bazanı jetilistiriw hám finanslıq járdem kórsetiw máselelerine ayrıqsha itibar qaratıldı.
O.Qozixonova Ózbekstanda hayal-qızlarǵa jaratılǵan sharayat hám imkaniyatlar haqqında tolıq maǵlıwmat berdi. Sonıń ishinde, mámleketimizde 2022-jılı «Hayal-qızlar, tınıshlıq hám qáwipsizlik» milliy háreket rejesi tastıyıqlanǵanı, Gender komissiyası dúzilgeni, máhállelerde bolsa 9,4 mıńnan aslam hayal-qızlar belsendisi hám jaslar jetekshisi lawazımları engizilgeni atap ótildi.
Prezident janındaǵı Mámleketlik siyasat hám basqarıw akademiyasında hár jılı kóplegen hayal-qızlar basshılıqqa tayarlanbaqta. Házirgi waqıtta basshı lawazımlarında olardıń úlesi 35 procentke jetken.
Xalıqaralıq ánjuman qatnasıwshıları mámleketler hám xalıqaralıq shólkemler arasında bekkem birge islesiwdi rawajlandırıw hám YW4P baslamasın jáne de keńeytiw zárúr ekenligin atap ótti.

N.Abduraimova, ÓzA