Huqıqıy qatnas

Bizge belgili, nızamshılıq hújjetlerine bola magistraturada oqıp atırǵan studentler ushın jumıs islewde hesh qanday qadaǵan etiw yamasa tosqınlıqlar joq. Biraq bul jaǵdayda ayırım normalar bar.
Tashkent mámleketlik yuridikalıq universiteti Yuridikalıq klinikasınıń xızmetkeri Kamola Ǵafforova bul boyınsha tómendegishe túsinik berdi:
– Miynet kodeksiniń 118-statyasına bola, Ózbekstan Respublikası puqaralarında jumıs islewge bolǵan uqıplılıq 16 jastan baslanadı.
Miynet kodeksiniń 383-statyasınıń mazmunına bola bolsa jumıs beriwshiler jumıs hám oqıwdı birge alıp barıp atırǵan xızmetkerler ushın zárúr sharayatlardı jaratıwı kerek.
Miynet kodeksiniń 182-statyasına bola háptesine 40 saat islegen bir stavka bolıp esaplanadı.
Miynet kodeksiniń 183-184-statyalarında jumıs waqtınıń qısqartılǵan dawamlılıǵı belgilengen bolıp, oǵan muwapıq eger xızmetker 1- yamasa 2-topar mayıbı bolsa yamasa onıń jumısı joqarı dárejedegi aqılıy hám nervlik zorıǵıwǵa alıp kelse de jumıs waqtın 40 saat emes 36 saatqa qısqartıwǵa haqılı.
Sonday-aq, bul normalardıń mazmunına bola, xızmetkerdiń jumıs waqtınıń dawamlılıǵı onıń jaǵdayı hám sharayatınan kelip shıǵıp qısqartılıwı múmkin. Mısalı, eger oqıw waqtı hám jumıs waqtı bir waqıtqa tuwrı kelip qalsa, xızmetker jumıs waqtınıń qısqartılǵan dawamlılıǵı tiykarında islewi múmkin.
Juwmaqlap aytqanda, eger basshı oqıw hám jumıstı birge alıp barıwıńızǵa kelisim berse hám bunıń ushın sharayat jaratıp berse, oqıw hám 1 stavkalı jumıstı birge alıp barıw múmkin. Nızam hújjetlerinde bunıń ushın hesh qanday qadaǵan joq. Buǵan Ózbekstan Respublikası Miynet kodeksiniń 118, 182, 183, 184 hám 383-statyaları tiykar bola aladı.

Gulnoza Boboeva, ÓzA