Oraylıq Aziya mámleketleriniń III parlamentleraralıq forumı “Oraylıq Aziya mámleketleri parlamentleri: regiondı hár tárepleme rawajlandırıw boyınsha nátiyjeli sheshimler” temasına baǵıshlandı.

Bishkekte bolıp ótken forumda Ózbekstan, Qazaqstan, Qırǵızstan, Tájikstan, Túrkmenstan parlamentleriniń basshıları hám delegaciyaları qatnastı.
Ózbekstan Senatınıń Baslıǵı Tanzila Norboeva forumda mámleketlerimiz arasında qáliplesip atırǵan óz-ara isenim hám jaqsı qońsıshılıq ortalıǵı tek ǵana ekonomikalıq birge islesiw emes, al mádeniy-gumanitarlıq baylanıslarǵa da kúshli túrtki berip atırǵanın ayrıqsha atap ótti.
Forumda sawda-ekonomikalıq baylanıslardı keńeytiw, birgeliktegi investiciyalıq joybarlardı ámelge asırıw, jaslardıń bántligi hám migraciya máseleleri, sonday-aq, sanlı qáwipsizlik hám regionallıq standartlardı islep shıǵıw sıyaqlı áhmiyetli baǵdarlar dodalandı.
***
Forum sheńberinde Senat Baslıǵı Tanzila Norboeva Qırǵızstan Jogorku Keneshi Toraǵası Nurlanbek Shakiev, Tájikstan Majlisi milli Majlisi Oli Raisi Rustami Emomali menen eki tárepleme ushırasıwlar ótkerdi.
Ushırasıwlarda mámleketler arasındaǵı parlamentleraralıq birge islesiwdiń házirgi jaǵdayı hám perspektivaları dodalandı.
Joqarı dárejede erisilgen kelisimlerdiń orınlanıwın támiyinlewde parlamentlik qadaǵalaw institutınıń rolin kúsheytiw áhmiyetli ekenligi atap ótildi.
***
Forum sheńberinde migraciya, miynet aǵımı, ekonomikalıq turaqlılıq hám puqaralardıń huqıqların qorǵaw máselelerine baǵıshlanǵan temaǵa baylanıslı sessiya bolıp ótti.
Onda migraciya regionnıń rawajlanıwına sezilerli tásir kórsetip atırǵan tábiyǵıy sociallıq-ekonomikalıq hádiyse ekeni atap ótildi. Migraciyanı ádil hám qáwipsiz basqarıw ushın bekkem nızamshılıq bazası, nátiyjeli institutlar zárúr ekenligi atap ótildi.
Sessiya sheńberinde regionallıq birge islesiwdi bekkemlew boyınsha migraciya nızamshılıǵın úylestiriw, xalıqaralıq konvenciyalardı ratifikaciyalaw hám implementaciyalaw, kadrlar tayarlaw boyınsha birgeliktegi baǵdarlamalardı islep shıǵıw hám qáwipsiz miynet migraciyası mexanizmlerin jaratıw sıyaqlı baslamalar alǵa qoyıldı.
Forum sheńberinde investiciya ortalıǵın jaqsılaw, ekonomikanıń ashıq-aydınlıǵın arttırıw boyınsha nızamshılıq, sonday-aq, sanlı sistemalarǵa baǵıshlanǵan sessiyalar da bolıp ótti. Onda jeke menshik sektordı rawajlandırıw, investiciyalar ústinen parlamentlik qadaǵalaw, sonday-aq, kiberqáwipsizlikti támiyinlew hám jeke maǵlıwmatlardı qorǵaw máseleleri dodalandı.

N.Abduraimova,
ÓzA