Aziya-Tınısh okeanı regionı mámleketleriniń on úshinshi Xalıqaralıq yuridikalıq forumı sheńberinde Ózbekstan Respublikası Joqarǵı sudınıń baslıǵı Baxtiyor Islomov Rossiya Federaciyası Joqarǵı sudı baslıǵı wazıypasın waqtınsha atqarıwshı Yuriy Ivanenko menen ushırastı.

Eki mámleket joqarı sud uyımlarınıń óz-ara qatnasıqların bekkemlewge qaratılǵan sóylesiw dawamında Ózbekstan – Rossiya arasında doslıq hám strategiyalıq sheriklik baylanısların bunnan bılay da rawajlandırıw hám bekkemlew áhmiyetli ekenligi atap ótildi.
Bul baǵdarda eki mámleket sud hákimiyatı uyımlarınıń óz-ara birge islesiwin jetilistiriw ayrıqsha orın iyeleytuǵını atap ótildi.
B.Islomov “Jańa Ózbekstan – jańa sud” principi tiykarında ámelge asırılıp atırǵan sud-huqıq reformalarına toqtap ótti.
Sud-huqıq sistemasına baylanıslı normativlik-huqıqıy hújjetler bazasın jetilistiriw, sırt el investorlarınıń huqıqların sud arqalı qorǵawdıń nátiyjeli mexanizmi, sudlardı qarjılandırıw sisteması, sudyalardı tańlaw hám tayınlaw tártibi jetiliskeni atap ótildi.
Tergew sudyaları institutı hám sudlardıń jumısın sanlastırıw hám oǵan zamanagóy málimleme-kommunikaciya texnologiyaların engiziw boyınsha ámelge asırılǵan keń kólemli jumıslar nátiyje berip atırǵanı atap ótildi.
Yu.Ivanenko Ózbekstanda ámelge asırılǵan sud-huqıq reformaları haqqında óziniń unamlı pikirlerin bildirdi.
Sóylesiw konstruktivlik hám doslıq ruwxında ótti.

N.Abduraimova, ÓzA