Nókis qalasındaǵı 10-sanlı «Nurlı mákan» kózi ázzi hám shala kóriwshi balalar ushın qánigelestirilgen mektep-internatında balalar hám úlken jastaǵılar arasında sporttıń golbol túrinen Qaraqalpaqstan Respublikası chempionatı bolıp ótti.

Ilajda sózge shıqqanlar elimizde mayıplıǵı bolǵan shaxslardı qollap-quwatlaw, olardıń huqıq hám nızamlı máplerin qorǵaw baǵdarında ámelge asırılıp atırǵan keń kólemli jumıslarǵa itibar qarattı. Olar zárúrli bilim hám kásip-ónerdi iyelewi, denetárbiyası hám sport penen shuǵıllanıwı ushın barlıq sharayatlar jaratılǵanın atap ótti.
Bellesiwde respublikamızdıń barlıq qala hám rayonlarınan kelgen kózi ázzi hám shala kóriwshi parasportshılar qatnastı. Qızıqlı ótken bellesiw juwmaǵında «Eresekler» komandası birinshi, «Univer» komandası ekinshi, «Nurlı mákan» komandası úshinshi orındı iyeledi.
-Ilaj Qaraqalpaqstan Respublikası Sport ministrligi, Ózbekstan adaptiv sport túrleri associaciyası Qaraqalpaqstan Respublikası basqarması tárepinen shólkemlestirildi, -deydi golbol sport túri boyınsha aǵa trener Barzu Kilibaev. – Maqset respublikamızdıń barlıq qala hám rayonlarında jasawshı mayıplıǵı bolǵan shaxslardı adaptiv sportqa qamtıp alıw arqalı fizikalıq reabilitaciyalaw bolıp tabıladı.
Jarıs juwmaǵında barlıq sportshılar qáwenderler tárepinen múnásip sıylıqlandı.
Maǵlıwmat: Golbol – bul kóriw qábileti tómen bolǵan sportshılar ushın arnalǵan komandalıq sport túri. Qatnasıwshılar úsh adamlıq komandalarda bellesedi hám ishine qońırawlar salınǵan toptı qarsılas komandanıń dárwazasına túsiriwge háreket etedi. Top tek ǵana qol menen taslanadı. Paralimpiya sport túrine kiredi.

Qaraqalpaqstan xabar agentligi