Búgingi kúni elimizde sud-huqıq sistemasında ashıqlıqtı támiyinlew, puqaralarǵa qolaylıq jaratıw maqsetinde, aymaqlarda kóshpeli sud májilisleri ótkerilmekte. Usınday ilajlardan biri Jınayat isleri boyınsha Nókis rayonı sudınıń baslıǵı Gulistan Bisenovanıń basshılıǵında ótkerildi.

Rayonlıq ishki isler bólimi imaratında bolıp ótken sud májilisinde Nókis rayonı Ishki isler bólimi jámiyetlik qáwipsizlik xızmeti Probaciya esabında turǵan 3 shaxsqa rayonlıq IIB baslıǵı tárepinen kirgizilgen usınıs-xatları kórip shıǵıldı.
Sud dodalawı dawamında barlıq hújjetler hám shaxslardıń minez-qulqı hár tárepleme úyrenilip, juwmaǵında usınıs- xatları qanaatlandırılıp, nátiyjede 3 puqara jazanı ótew múddetinen aldın shártli túrde azat etildi. Bul bolsa, olardıń jámiyetke qayta beyimlesiwi ushın úlken imkaniyat jaratadı.
Sud májilisiniń juwmaǵında sudya qatnasıwshılar menen sóylesip, búgingi kúnde áhmiyetli bolıp turǵan máselelerge ayrıqsha toqtap ótti. Atap aytqanda, shańaraqlıq (turmıslıq) zorlıq, jınısıy kúsh kórsetiw sıyaqlı illetler jámiyettiń salamat ruwxıy ortalıǵına zıyan jetkeriwi múmkin ekenligi atap ótildi. Sonday-aq, bul jınayatlar hám huqıqbuzarlıqlar ushın jazalar belgilengenligi tayın ekenligi ayrıqsha atap ótildi.
– Hár qanday jınayatqa jaza tayın. Ásirese, shańaraqlıq zorlıq hám jınısıy kúsh kórsetiw jámiyetimizde keskin qaralatuǵın hádiyseler bolıp esaplanadı. Sonıń ushın bunday illetlerdiń aldın alıwda tek ǵana huqıq qorǵaw uyımları emes, al pútkil jámiyet juwapkershilikli bolıwı zárúr, – dedi jınayat isleri boyınsha Nókis rayonı sudınıń baslıǵı Gulistan Bisenova.
Kóshpeli sud májilisi – bul tek ǵana belgili bir islerdi kórip shıǵıw procesi emes, al xalıqqa huqıqıy mádeniyattı sińdiriw, olardı nızamlarǵa húrmet ruwxında tárbiyalaw ushın da qolaylı maydan esaplanadı. Sonlıqtan, bunday ushırasıwlar puqaralardı huqıqıy sana-sezim hám sawatlılıqqa shaqırıwda úlken áhmiyetke iye bolmaqta.

Qaraqalpaqstan xabar agentligi