Suw jetispewshiligi artıp baratırǵan házirgi waqıtta suw rezervlerinen únemli paydalanıw, suwdı únemleytuǵın texnologiyalardan paydalanıwdı keńeytiw áhmiyetli máselege aylanǵan.

Respublikada suwǵarılatuǵın jer maydanı 4,3 mln. gektardı qurap, suw resurslarınıń ortasha 90 procenti awıl xojalıǵında, qalǵan 10 procenti bolsa kommunallıq-turmıslıq, sanaat hám ekonomikanıń basqa tarmaqlarında paydalanılmaqta.
Búgingi kúnde jámi 2,6 mln. gektar maydanda suwdı únemlewshi texnologiyalar engizilgen. 2025-jılı 101 mıń gektarda tamshılatıp, 29 mıń gektarda jawınlatıp hám 13,6 mıń gektarda diskret suwǵarıw jolǵa qoyılǵan hám 444 mıń gektar maydanda lazerli tegislew jumısları alıp barılǵan. Nátiyjede 2 mlrd. kub metr suwdı únemlewge erisilgen.
Usı jılı paxta maydanlarında tamshılatıp hám diskret suwǵarıw texnologiyasın engizgen awıl xojalıǵı ónimlerin jetistiriwshilerdi qollap-quwatlaw maqsetinde 189,8 mlrd. sum subsidiya qarjıları ajıratılǵan.
Bul haqqında parlament tómengi palatasınıń búgingi májilisinde aytıp ótildi. Onda suw xojalıǵı ministri Sh.Hamraevqa jiberilgen suw resurslarınan nátiyjeli paydalanıw, suwdı únemleytuǵın suwǵarıw usılların hám texnologiyaların engiziw jáne magistral hám ishki kanallardı betonlastırıw jumıslarınıń barısı haqqındaǵı parlamentlik sorawǵa kelgen juwap kórip shıǵıldı.
Ministr juwabında keltiriliwinshe, suwdı únemleytuǵın suwǵarıw texnologiyası úskenelerin islep shıǵarıwdı lokalizaciyalawǵa da úlken itibar qaratılmaqta. Búgingi kúnde jergilikli óndiris kárxanalarınıń sanı 60tı qurap, lokalizaciyalaw dárejesi 80 procentke, jıllıq óndiris quwatlılıǵı bolsa 250-300 mıń gektarǵa jetkerilgen. Bul bolsa komplektlewshi bóleklerdiń ózine túser bahasın sırt elden tasıw qárejetlerin únemlew esabınan 15-20 procentke shekem azaytıw yamasa gektarına 5-7 mln. sumǵa arzanlatıw, importtıń ornın basatuǵın sapalı ónimler islep shıǵarıw hám ishki bazar tolıq támiyinlenip, qońsı mámleketlerge eksport etiw imkaniyatın bermekte.
Nızamshılıqqa bola, suwdı únemlewshi texnologiyalar engizilgen maydanlar ushın suw salıǵınan 30 procent jeńillik qollanılıwı, bul jer maydanları 5 jıl múddetke jer salıǵınan azat etiliwi diyqan hám fermerlerge túsindirilmekte.
Parlament sorawına juwapta mámleketimizdegi 173,5 mıń km. suwǵarıw tarmaqları sistemasında alıp barılıp atırǵan jumıslarǵa da toqtalıp ótilgen. Málim etilgenindey, 2025-jılı mámleketlik byudjet qarjıları esabınan 95 joybar sheńberinde 518,7 km. kanallar betonlastırılǵan, 25,3 km. lotok ornatılǵan, 49,1 km.jabıq suwǵarıw tarmaqları qurılǵan hám rekonstrukciyalanǵan. Klaster hám fermer xojalıqları tárepinen de 18 mıń km. ishki suwǵarıw tarmaqları betonlastırılǵan.
Ministr juwabında suwdı únemlew tarawında ámelge asırılıp atırǵan jumıslar jaǵdayı tolıq bildirilgeni aytılıp, parlament sorawına juwap maǵlıwmat ushın qabıl etildi.

Muhtarama Komilova, ÓzA