Ózbekstanda toy-máresim sıyaqlı dátúrler tariyxtan jámiyettiń áhmiyetli mádeniy bólegi sipatında qáliplesken. Biraq, sońǵı jılları bul máresimler kóp jaǵdaylarda artıqsha hám hátteki ekonomikalıq jaqtan awır júkke aylanǵan. Húkimettiń sońǵı qararı mine usı mashqalanı saplastırıwǵa qaratıldı.

Atap aytqanda, Ózbekstan Respublikası Ministrler Kabinetiniń 2025-jıl 16-sentyabrdegi 589-sanlı qararına muwapıq, “Aqılǵa uǵras tutınıw” (Save Food) baǵdarlaması sheńberinde toylar, máresimler hám shańaraqlıq ilajlar belgilengen tártip tiykarında qadaǵalawǵa alınadı.
Húkimet qararı menen artıqsha qárejet talap etetuǵın úrp-ádetler, sonıń ishinde, “kúyew nókeri”, “ata kórdi”, “sep jaydı” hám matam máresimlerindegi “jeti”, “piyshembi”, “ekshembi”, “jigirma”, “qırqı”, “jıl ası”, “aqsha tarqatıw”, “gezleme úlestiriw” sıyaqlı máresimlerdi ótkeriw qadaǵan etildi.
Sonday-aq, toy, mereke hám shańaraqlıq máresimler belgilengen sheklewler tiykarında ótkeriledi:
– shańaraqlıq ilajlar – 200 ge shekem;
– as máresimi – 250 ge shekem;
– qos toylar – 250 ge shekem;
– qos toy asları – 300 ge shekem.
Húkimet bul qarar arqalı jámiyettegi artıqsha úrp-ádetlerdiń aldın alıw, shańaraqlardı qarızdarlıq hám “ózin xalıqqa kórsetiw” basımınan qutqarıwdı maqset etken. Kópshilik jaǵdaylarda ata-analar hám jas shańaraqlar millionlaǵan qarjını toy hám merekelerge jumsap, keyingi jıllarda qarızların tólew menen áwere bolıp qalmaqta.
Húkimet qararı dástúrlerge qarsı emes, al artıqsha qárejet, ısırapgershilik hám sociallıq teńsizlikke qarsı gúresiwge qaratılǵan. Bul sheklewler arqalı mámleket xalıqtı finanslıq júkten qorǵaw, máresimlerdiń mazmunı hám maqsetin saqlaǵan halda onıń sapasın jaqsılawdı gózlemekte. Bul qarar jámiyette awır hám uzaq jıllıq, kereksiz úrp-ádetlerdi saplastırıwǵa qoyılǵan áhmiyetli qádemlerden biri.

Dildora DWSMATOVA.
ÓzA