Ótken jılı Ózbekstan Respublikası Prezidenti Sh. Mirziyoev Qaraqalpaqstanǵa ámelge asırǵan xızmet saparı waqtında Kegeyli rayonı Júzimbaǵ awıl puqaralar jıyını aymaǵındaǵı jas diyqanlar menen ushırasıp, olardıń usınıs hám baslamaların tıńlaǵan edi. Ushırasıw dawamında jaslar ózleri jetistirgen zúráátti qısqı máwsimde sapalı saqlaw ushın zamanagóy suwıtqıshlar zárúr ekenligin bildirgen edi.

Aymaq jaslarınıń ushırasıwda bildirgen bul tilekleri ámelge asıp, Ózbekstan Respublikası Ósimlikler karantini hám qorǵaw agentliginiń baslaması menen jas diyqanlarǵa Prezident sawǵası sıpatında 1 tonna sıyımlılıqqa iye zamanagóy suwıtqıshlar jetkerip berildi!
Jaslarǵa berilgen bul sawǵa tek ǵana jaslardıń miynetine berilip atırǵan joqarı baha emes, al, elimizdegi hár bir jastıń arzıw-niyetleri húrmetli Prezidentimizdiń dıqqat-itibarınan shette qalmaytuǵının jáne bir márte dálilledi.
Óz gezeginde aymaq jasları da ózlerine kórsetilgen bunday joqarı húrmet ushın Jurtbasshımızǵa úlken raxmetler aytıp, Prezidentimiz tárepinen ózlerine bildirilgen isenimdi tolıq aqlaytuǵının atap ótti.

Adilbay Orazov,
Qaraqalpaqstan xabar agentligi sholıwshısı